Вай бераша гIалгIай мотт бувцар догдоахаш

Шоай къаман мотт бувцара гIулакх чIоагIа ира а чоалхане а латт гIалгIашта шоашта юкъе. ХIана аьлча, бувца ма безза из бувца ховш а, дерригача дешай маIан ховш а нах дукха бац, къаьстта кагегIчарна юкъе хIаьта а. Цудухьа дукхчар айдаь дувцаш да мотт лорабарах дола хаттар. Шоай берашта мотт хац яхаш из царна Iомабара тIехьа оарц дехаш ба цаIаш, шоллагIбараш цох доккхал деш царна шоай къаман мотт ца ховш гIадбаха ба. Мичча тайпара дале а мотт кхувш доагIача ноахало Iомабарга сатувсаш, цу тIехьа уйла еш ба нах. Амма дийцадар аьнна чакхдалац гIулакх, ма хетта из вIаштIехьадаргдолаш боагIача боараме къахьега деза массане а, могача тайпара оарцагIа а баьнна.

 

КПЦ «Эздел» яхача юкъарчено дIадахача шера «Король лев» яхача берикинон таржам даьдар «Лом паччахьа» аьнна цIи а йолаш. Цу хана боккха кха хинна гIадбаха тIаийцар из берий кино наха. ХIана аьлча, берашта дукха дезаш а, царна сакъердаме хеташ а, уж дукха хьежаш а фильм да «Лом паччахьа». Укх шера а из мо цхьаькха проект чакхъяккха уйла йолаш цу тIехьа къахьегаш ба «Эзделахой», цар хьаяхачох хIанзле къамаьл гIалгIай меттал доаккхаш таржам доладаьд «Мадагаскар» яхача фильман.

«Кастта «Мадагаскара» чура оакхароша гIалгIай мотт бувцаргба. ХIана аьлча цун таржам де лаьрхIа да тхо гIалгIай меттал. Тахан вай берашта мотт хац яхаш уж телевизорашта хьалхашка Iо а ховшадаь вай даьгIадар аьнна доалаш дац. Уж тайп-тайпарча берий киношка ца хьажийтача далац вай, иштта эттай тахан зама. Вай берашца болх беш телевизор, телефон, ловзаргаш да царна шоай мотт бицбеш. Цудухьа цу телевизора чу а телефона чу а гIалгIай мотт хургболаш къахьегаш да тхо берий киношта таржамаш дирца», — аьнна дийцар «Эздел» юкъарчен кулгалхочо Ведажанаькъан Анзора.

Текстана таржам деш волчо яхачох иттех дийнахьа из болх чакхбаргба. Атта боаца болх ба оакхарий багенаш гIалгIай меттал хьалее езачаргарабар. Шоашта ма могга тара хила еза цар оаз кIалхарчун, аькхан оамалаш а тараерзае еза берашта цох ма хетта сакъердам хургболаш. ХIаьта таржам де «Мадагаскар» харжар ший никъ болаш гIулакх да. «Ер «Мадагаскар» яха берий кино оаха харжар бахьан малагIа да аьлча, соахка «Лом паччахьа» хьахьокхаш кинотеатре цунга хьажа даьхкача берашка кхоъ фильм белгал а даь кхач тассийтабар оаха, дукхагIа цар хоржам баьр таржам даь чакхдоаккхаргда вай аьнна. Цу хана ер хьалхадаьлар, цудухьа оахош царна яь чIоагIо чакх ца яьккхача далац тхо. ХIанзле текстан таржам деш да тхо, из йисте ма доалла кастинга а яь цига оазашца товш бола нах белгал а баь, цул тIехьагIа болх дIаболабергба оаха. ГIаьбартой-Балкхарой мехкара режиссер Атмурзаев Расул вайцига хьа а воалаваь цунца цхьана берий кино гIалгIай меттал доаккхаргда оаха. Из болх дика бовзаш а 100 совгIа берий киношта таржамаш даь а, дика говзал йолаш режиссер ва из. «Лом паччахьа» таржам деча хана а вайна цу гIулакха новкъостал деш дакъа лаьцар цо, фильм чакхдаллалца», — йоах Анзора дIахо.

«Сердало» дешархошка хоам бу аз, дукха ца говш цу гIулакха кастинг хургхиларах. ЛадувгIаш а, фийла а хила, нагахьа санна шоай цу юкъе таржам деш дакъа лаца чам бале. Вай кхетаде деза вай аьнна цхьа дош бахьан долаш кхувшбоагIачар шоай къаман мотт Iомабе тарлуш долга.

 

Матенаькъан Илез

 

Добавить комментарий

Ваш e-mail не будет опубликован. Обязательные поля помечены *