КХАЬКХАЛАХОЕХ

Укх лоам чу хьа а хинна, чIоагI а денна дIаэтта хиннад кхаь шахьарара (Кхаькхалара) дола тайпаш. Аьгеи, Хамхои, ТIаргами яхача кхаь вешех хьадоагIа уж. Лоаман ГIалгIайче гIолла чакхдоалаш хьадоагIача Эсах улача мехка вахаш хиннав цар да. Ший вала ха хьатIаэттача, къонгаш хьатIа а бийха, хаьттар цо хIаранега, фу де ховш а фу леладе дага волаш а ва царех хIаравар. 3IамагIча ТIаргамас аьннад: «Дахчан къулг бе ховш ва со». Дас аьннад: «ХIанз се Iеш вола моттиг дIалу аз хьона, укхаза Iо а хай, хьай боахам дIаболабе». ШоллагIча вошас, Хамхас, аьннад: «Сона Iад хьаде а хов, чарахье ахара тIера а ва со». Йихе-да дIаухка лоамаш деннад цунна. ВоккхагIча вошас, Аьгас, аьнна хиннад: «Сона дукха еза хи йисте ула моттиг; цигача торо дикагIа хургьяр са хьаьша тIаэца а сай ды лувчабе а, кхы хIама эшац сона». Дас дIаелар цунна Эсах дIаухка цонаш.

ГIалгIайче керттера долча чIожах вежараша хьалйир шоай гIалаш. Цар кара хилар лоамашкара аренгахьа бода никъ. Вежарашта мехках дIа-хьа водача сагах, жа-доаханах боал бала безаш хиннаб. Боалах дала дезаш хиннад пхо-молха. Масала, цу наькъах дIаводача саго Iобила безаш хиннаб цхьа пхо, цунца доагIаш дола молхеи.

Ха дIайодо-ош, вежарий кара хьаIайра доккха рузкъа. Цар цIераш техка хьахилар шахьараш. Аьга-кхал, Хамха, ТIаргам.

Царца бувзам бир Баркинхоша, Йовлоша, Ферта-Шоулаша яхача тайпаша. Кхаь веший тIехьено (кхаькхалахоша) кара долча герзаца шоай доал оттадир фаьппаштеи аьккхаштеи.

 

Добавить комментарий

Ваш e-mail не будет опубликован. Обязательные поля помечены *