Г1АЛГ1АЙ МЕХКА КЪАМАН ЮКЪАРА ГАЗЕТ

ОАРЦ хиннар

Малх чубиза баланза ха яр из. Ковна гонахьа карт е йолаяь, хьалхара берд хьош вар Къарамсолта. Хьахезар уй тIа а яьнна, барт беттача ший сесага оаз.

— Фу хада акхар! Бер дIаарадалийта йиш мичай акхаргахьара-м, КъотIаш, во къотIаш!

Вувцаш ший бе боалла саьрг дIа а хийца, хьалвийрзар Къарамсолта.

— Фу хиннад цига, хьанна серд хьо, яьй?

— Шовхала воIа сердкх, наха вийна ший да а вита вагIача.

— Фу даьд цо?

— «Фу даьд цо!» МутIарга кертах кхера техаб-кх цун къотIо.

— ХIай? Кертах кхера?

— Шоаш даьр дутандаь да цар леладер-м. ЖIалена тIой чудийттача а могийт, гIадж теха Iатта муIа дIаяхийтача а хIама аланзар...

Оззабаь цхьа хьокха хьа а баьккха, улицагIа Iоволавелар Къарамсолта. Едда тIехьа а кхийна духьалъиккхар сесаг.

— Фу леладу Iа хIанз? Селла корзагIа а ма вала.

Хьокха а баьккха...

Сесаг дIа а тетта, довхой ков долчахьа бухь биллар Къарамсолтас.

Цхьа коаниI мара хоадаяьяцар цо, Iуми духьалкхийтача.

— ХIанз фу ду Iа, ва Къарамсолта, довна вода хьо? — аьнна, юхасецар из.

— Сона ца эшаш, ца дезаш качдера ер… Шовхала воIо.

— Фу даьд цо?

— Корта боаттIабаьб.

— — Хьан корта?

— Вай кIаьнка.

— Аьъ, вошшийна вир хила цанна! — ДIаулув а ваьнна, волавелар Iуми.

— Аз шийгара воаккхаргвац мотта хургда Шовхала воIа! — йоахар Къарамсолтас. — Воаккхаргва вай даха, воаккхача хана во а воаккIаш-м.

— Борза-наькъанна даьр диса моттиг хинна а яц, хург а яц! — тайпан веший денал ураувттадора Iуме.

Ший коара араваьлар Салман. Цар шинне тайпах вар из а.

— Фу леладу оаш? — хаьттар цо.

— Хьаволле хьо тхоца, фу лело-м тIехьагIа дувцаргда вай, — аьлар Iуме.|

— Со-м балха ваха араваьнна ма вий.

Дукха ха йоаццаш мехкадаьттана бурувтохача балха ваха, хIанз вахтови автобус лорае коа тIа ваьннавар из.

— Волле, болх бита! — тIачайхар Iуми.

— Ой, фуд цига да?

— Корта боаттIабаьб, эхь даьд вайна!

— Корта? Хьан корта?

— Мухьмада! — Къарамсолтий кIаьнках МутIарг а ца оалаш, йизза цIи яьккхар Iуме.

— МалагIча Мухьмада?

— Лоткъам эца воалл хьо? Укхун кIаьнка.

Цанна тIеххьа дIаволавенна хинна Салман юхасецар. Iуми юхахьажар.

— Хьоморг ва хьона из тайпан сий доадер.

— Саг ва везац соца, — аьлар Къарамсолтас, — е из а, е хьо а, цхьаккха а. Айса нийсдергда аз сай дов.

— Аьъ, из фу мотт ба? Хьо лечча метте вала кийча ва со.

Цкъа корта Iочу а тоIабаь, тIаккха майрра хьалхьажар Iуми.

Ший коанаIарга боккхача кхерий тIа Iохайна вагIар Эсамарза. Шоай болар лаьгIдир шинне а, воккхача сага сайрадика йийцар. Ший кулгий пIелгий голингаш дагаръеш санна, бордаш детташ цхьа юкъ яьккхар Эсамарзас.

— Фу ду оаш, мича ваха ваьннав шо шиъ?

— Гаьна долхац тхо-м, — жоп делар Къарамсолтас.

— Шовхала воIаца дувца долх-кх тхо, — тIатехар Iуме.

Цкъа цхьан кулгеи тIаккха вокх кулгеи голингаш цIаькха а дагар а яь, Къарамсолтий бе боаллача хьокханна бIарахьажар воккха саг.

— Фу даьд цо?

Iуме делар жоп:

— Корта боаттIабаьб...

— Iа боккъала ях?!

Хьан корта боаттIабаьб, фу техай, хьан техай, цхьаккха хаттар динзар Эсамарзас. Ши бIарг вIаштIа а тоIабаь, уйла еш санна, цхьа юкъ а яьккха, аьлар:

— Берзах вай фу хьадоладелча денз воашкара совле дIа ца йохьийташ хьадоагIа вай!

— Йохьийтарг-м оаха а яц из! — аьнна, Къарамсолтал а хьалха а ваьнна, волавелар Iуми. Цунна дIаулув ваьлар Къарамсолта а.

— Сабардел шинне а, — аьнна, тIехьайистхилар воккха саг.

— Шовхала виIий коанаIарга дакъий Io-м даьра дохкаргда, совле дIа ца йохьийташ-м, — ший ураэтта денал дужаде магацар Iумена.

— ДIачукхайкал, хьаарабехал Махьмад-Башири Махьмад-СаIиди.

Уж Эсамарзий виIий къонгаш бар.

— Саг эшац, — аьлар Къарамсолтас.

— Тхо шиъ хилча-м тоъаргва, — тIатехар Iуме.

Воккха саг айвелар, ше дIачукхайкар коа.

— Баьхкка хьаайттар Махьмад-Башир а Махьмад-СаIид a.

— Волле шаккха цанна тIеххьа, — Къарамсолтаннеи Iуменеи сулхьаш тIахьерча кулг дIатIахьекхар Эсамарзас. — Уж лечча метте вала веза шун шинне.

— Фуд цига? — хаьттар Махьмад-СаIида, Махьмад-Башира из а хаттанзар.

— Корта боаттIабаьб! — хIанз а Iуме делар жоп.

— — Хьан корта?

— Къарамсолта кIаьнка корта.

Велакъежар Махьмад-СаIид.

— Из мара дий?

— — Тоъаций? — аьлар Iуме.

— Бераш вIашагIлетадар яхаш довна ухе-м, вIаший карагIа боврг ма бий нах.

Махьмад-Башир тIачайхар вешийна:

— Фу зIок да Iа деттар?

ХIаьта Эсамарза-м сатийна ший хьехам беш вар:

— Тахан бера техай, кхоана воккхачоа тохаргья. Техача дутаргдоацалга дIахайта деза. Берзах вай фу хьадоладелча денз сагага совле дIа ца йохьийташ хьадоагIа вай.

— Бакълув Эси. Далла хоастам ба-кх иштта тхона хьехар де хьо волаш! — Майрра волавелар Iуми. Цунна дIатIехьаволавелар, бе боаллаш хьокха а болаш, Къарамсолта. Махьмад-Башир, ведда цIагIа чу а иккха, шолгоара топ бе а йоаллаш, юхаараиккхар. Вокх шиннена дIатIехьаведар из.

Шовхала виIий коанаIарга дIакхоаччаш цхьан саго пхьош озадир Къарамсолтий. Юхахьажар из: цун МутIарг вар из.

— Дади, сенга долх шо?

Юхасецар Къарамсолта. Вожаш шиъ а сецар. IотIахьажар Къарамсолта кIаьнка керта: хьоарчадаь кIай киси а е докъаденна цIий а довнзар цунна.

— Мича техаб хьона кхера? — хаьттар цо.

— Гой, уккхаза… — кертах кулг а хьийкха, цхьан метте пIелг тIаоттабир кIаьнка. — ВIалла лаза а лазац. Кхерто мича бар из-м гарза ма ярий.

Кхоккхе къонах вIаши бIарахьажар, тIаккха шорттига коанаIаргара юхаболабелар.

Автор:
​Боков Ахьмад
28.11.2017 11:39
44

Комментарии

Нет комментариев. Ваш будет первым!
Загрузка...