Даьла цIенна гонахьа гаьнаш егIар

Укх деношка ДаьттагIа гаьнаш дIайогIаш хилар юрта бахархой. АНО «Созидание» яхача фондо вIаштIехьаяхарца ДаьттагIарча юкъарча маьждига коа гаьнаш дIаегIай. Даьла цIен гонахье хозъеш дIаегIараш 20 инжира га я. Цох бола хоам бу цу юрта администраце юрта гIулакхаш дIахьош управделами (юрта гIулакхаш дIахьош) болх беш волча ДаьттагIа вахархочо Кокархой (Пидиев) Мухьмада.

– Созидание» яхача фондо Iалашъярца маьждига коа гаьнаш дIаегIараш юрта бахархой ба. Дала къоабала а даь дIаэцалда вайгара ший духьа вай къахьегар. ДаьттагIа хьалдувла шоашта, укхаза цIена фо да, эздий бахархой ба, хоза 1алам да, – йоах Мухьмада вай мехка бахархошка кхайкаш.

Къаьстта инжира гаьнаш шоаш маьждига гонахьа дIайогIар фу бахьан долаш да а, царех боалача пайдах а дийцар дIахо юрта гIулакхаш дIахьош волча Мухьмада.

– Инжир хьоахаяь я Къурӏана чухьа а. «Ат-Тин» яхача суврата 1-ча аятагахьа дув буаш йоах Дала (маIан): «Инжирах а оливка гаьнах а дув буъ аз». Шоаш хьалуш болча сомагахьа уж тамашийна хиларах дув буъ царех Дала. Адама пайдане а, дарбане а я инжир, цудухьа уж гаьнаш дIайогIар лерхIаме хет тхона.

Белгалдаккха деза дIадахача шера шоай юртарча маьждига тхов кердабоаккхаш а, цун ковна гонахьа карт оттаеш а юрта бахархоша къахьийгалга. Шоай юрта хьадеш дола хIама сихонца вIашагI а кхийте, кхоачаш ду цар.

– МоллагIа юрта хьадеш дола хIама цу сахьате дIаоарцагIа а баьле, дог раьза долаш боккхача кхааца кхоачашду тха юрта бахархоша. Маьждиг тоадой а, хий тIадоаккхе а, никъ булле а, га дIайогIе а – юкъара хIама геттара тIадийрзе хьаду оаха. Дика кхетаду юртахоша из шоашта деш долга а, цох шоай дезалашта, тIехьа тIакхургдолча ноахала пайда баргболга а, – белгалдир Мухьмада дӏахо.

Мухьмада лакхе ма аллара, бокъонца я а я ДаьттагIа чIоагIа хоза юрт. Хьаьша дукха везаш, из дика тIаэцаш эздий нах ба ДаьттагIа бахархой. Из сона дика хой. Цхьан хана массехк бIаьш дезалаш баьхабале а, таханарча дийнахьа итт дезал бахац  цига. Массанахьа Iи яьржа паргIато я аьнна хете а, укх юртара хьал ма хетта дац: ишкол, дарбанче, кхыбола юкъара кхоачам эшам болаш ба укхаза. Хий а массахана вIаштIехьдоалаш дац. Цудухьа ма хетта алсамъялац юрт. Нах паргIато йолчахьа дIагIерт, бакъда, ДаьттагIой шоай хьамсарча мехка чугIерт, цигара вахар атта деце а, шоай юрт дукхаезаш. Укх шера асфальт а билла тоабергба аьнна никъ а ба юрта дIачубодаш. Никъ хилча, дIаходар-м вIаштIехьдоаккхаргдар наха. Шера а, шаьра а никъ булларе аттача даргдар наьха вахара хьал.

МАТЕНАЬКЪАН Илез