ГIалгIайчен юртбоахамхой ялаташ чуэцаш ба

«Шиш боацаш кха а мегадац», йоах гIалгIай халкъа кицо.
Хьаэттай мангал хьокхаш, ялаташ чуэцаш, йол Iалаш еш йола ха. Даьла къахетамца хьагучох укх шера ялаташ дика хьийкъад. Кхашта юхе гIолла тIехвоалаш хилча теркаш лаьтта ялатий аренаш карарча хана даггара хьокхаш а, цхьадар хьекха а болх беш я юртбоахама юкъарченаш. Ялат дIадийначул тIехьагIа кхай тIа къахьегарг хьежжа хьувкъам хиннаб наьха.

ГIалгIай Мехка юртбоахама министерстве чуйоагIаш мел йолча масса паччахьалкхен унитарни предприятешкеи, кооперативашкеи, КФХ оалача юртбоахам къахьегама юкъарченашкеи хьинаре ялат чуэцарах бола болх дIахьош ба. Из хоам бир ГIалгIайчен Мехкада Келматнаькъан Махьмуд-Iаьлас тхьамадал а деш правительстве шеръяь дIайихьача кхетаче. Цох бола хоам язбу ГIалгIайчен лаьрххIа йолча сайта тIа.
Хьадувцачох карарча хана мехка ялат чуэцарах бола лостам баьб 2326 га, долча лаьттан даькъ тIа. ХIаьта юкъера хьувкъам гектара тIара 28,3 центнеров хиннаб. Мукх хьекхаб 4976 га долча лаьттан тIара, цун хьувкъам – 27 ц/га. Ялаташ чуэцара болх дIахо а дIахьош ба массаболча агротехнически кхоачамца ший ханнахьа кхоачашбирца.
Ала деза, чуийца ялат дIаоттаде деза паччахьалкхен унитарни предприятей складаш хьахинна хьувкъам чуэца мара ца безаш кийча латташ хилар а. Тахан болча кхоачамо аьттув лургба 35 эзар тонн совгIа ялат чу а ийца дIаоттаде. Министерствога хоам бирца цига шоай ялат дIаоттаде йиш йолаш хургба шоашта хIама хьадеш къахьегаш бола фермераш а. Келматнаькъан Махьмуд-Iаьлас хьалхадаккхарца вIашагIбеллача бартаца тIехьагIа мехка гIулакха накъадаргдолаш юстарадаккха лаьрхIа дола ялат а цига дIаоттадергдолаш да.
Кхетаче дIахьоча дийца даьшхар «Малое и среднее предпринимательство и поддержка индивидуальной предпринимательской инициативы» яхача къаман проектах дола хаттараш а. Цу юкъе да КФХ лелаечарна шоай юртбоахама гIулакх дегIадоаладара гранташ хьахьожаяраи, кооперативаштасупсидеш декъари, иштта кхы а. Из деррига кхоачашде лерхI къаман проект йизза кхоачаш а яь дIачакхъяккхарца.

Матенаькъан Илез