Хало тIаеча вовз саг

Нах маьрша бахача хана, мехка тIалатташ сагото йоацача хана, саг бокъонца ца вовза тарлу. Бакъда хало тIаеча гучайоал цун дика а во а оамалаш. Вовар вехе хьовз, гIалаташ дувлийт; дикачо къаманна гIо ду, ший гIулакхаш дите, цунна фу эш, малагIча метте ше цунна накъаваргва хьож. Ишттача нахах ва аьнна хет сона гаьнарча Петербурге вахаш вола Цокиев ГIазмахьмада Хьамзат.

1992-ча шера лоалаха дахача шин къаманна юкъе тIом хиннача хана, вай республике хIирий мехкара Iочубаьхка дукха фусамех беха нах болча хана, гIинбухерча столицера ший болх, йIайха фусам, дезал бита, къаманна оарцагIвенарех цаI вар Цокиев. Из ше лор хиларах тарра, дукха хIама карахдаьлар цунна цу шерашка, мехка хIама тоадеча, наьха унахцIено меттаоттаеча даькъе. Дукха шераш дIаихад цул тIехьагIа. Со цецвоалаш да цхьа хIама, цхьаннахьа цох яздаь, цо даь дикадар белгалдаьккха дайнадац сона, укх тIехьарча шерашка арадийннача книжкаш тIа. Из нийса дац. ГIалгIай республика кхоллаш, дегIайоагIаш къахьийгарашта юкъевихьа, кхычарех санна из вовзийташ дукха йоккха йоаца статья мукъагIа язъе езар. Тахан из юха дагавоха, цо хьабена вахара никъ бовзийта безам ба са газет дешарашта. Наьсарен районерча газете балха вар со цу халача шерашка. Цкъа Цокиев Хьамзат волча вахар со, анкета хаттараш а ийца. Со-м, бокъонца бакъдар аьлча, цо се иштта дика тIаэцаргва мотташ а, сай юхь ергья мотташ а вацар. Амма Хьамзата, согара хаттараш дIа а ийца, сона хеттача тайпара жоп делар царна. «Сердало» газет дешарашта а ловргда аьнна хет сона Хьамзат малав, мишта ваьха саг ва ха. Еш вай из анкета, иштта яздаьдар цу тIа: «Тахан оаха шоана вовзийт ГIалгIай Республикан унахцIенони вахар лорадареи министр Цокиев ГIазмахьмада Хьамзат.

  • Мичахьа, маца ваьв?
  • 1943 шера 1 июне Наьсарен района Iаьлий-Юрта.
  • Мичахьа, маца чакхъяьккхай юкъера школа?
  • 1960 шера Буро тIа.
  • Цул тIехьагIа?
  • 1966 шера хIирий Паччахьалкхен медицински института дарбан факультет яьккхай. 1967 шера денз, тIема гIулакхе ва. Дийшад тIема академе.
  • Балхаш даьд?
  • Артиллере, зинитни полкашка лорий балха кулгал деш, эскара, гарнизона, округа санитарно-эпидемиологически отряда керте латташ.
    1988 шера денз, – С. М. Кирова цIерагIча Санкт-Петербургерча тIема Академе хьехархо.
  • Алапи мел дар цига?
    -120 эзар сом.
  • ХIанз мелд?
  • 58 эзар 800 сом.
  • Лелавеш машен йий?
  • Я «Газ -31 029».
  • Дезал?
  • Сесаг – Евлоев Къамбулата Фатима. Санкт-Петербургерча Сийлахь-боккхача Даьймехка тIема заIапхой госпитала лор я.
    Кхо воI ва. Мурад – гIишлонхо, Мухьмад – экономист, Муслим – студент.
  • Яздаь Iилман балхаш дий?
  • Кепа йийттай Iилман статьяшта, балхаца ювзаенна кандидата диссертаци язъяь ваьннав.
  • Эпсара чин?
  • Полковник.
  • Маца деннад?
  • 1987 шера.
  • Мукъача ханах пайда мишта эц?
  • Исторически книжкаш дешаш, зIак хьокхаш.
  • Эггара дукхагIа еза шера ха?
  • Ахка.
  • Партецара гIулакх?
  • Къаман патриот ва, бакъда националистически патриот вац».

Лакхе аз белгалдаьхача гIалгIай къаманна халача шерашка цIа а вена, къона республика когаш яххалца цунца а хинна, ший балха тIа юха тIавахавар Цокиев. Хала дале а, ший къаман духьа дар цо леладаьр. Цул совгIа, балхара цунна вайцига луш хинна алапи нийсса ах кIезигагIа дар, Питере хинначул. Цу моттиго а хьагойт, из шийна бола пайда лехаш саг а воацаш, фу дича тоалургдар-те вай мехка хьал, адамий вахар яхаш йолча уйланца къахьегаш волга. Из а цу заман чухь цунна уллув лаьтта кхыбола эпсараш-гIалгIай а бицбе мегаргбац вай. Уж дагабоагIачар, цар гIулакхаш дайначар къонача ноахалашта дIадувца деза царех лаьца, царех бола дагалоацам даим дийна латтаргболаш. Цу шерашка цунна уллув бар инаралаш Султыгов Мухьмад, Аушев Руслан, Цечоев Муса, полковникаш Тимерханов Ювсап, Плиев Руслан, Аушев Башир, Плиев Iамархан, Дзауров Iаьла, кхыбараш.
Арчаков С.