Хьаьший-туристаш тIаийбара ха дIайолаеннай

ГIалгIай Мехка доазон тIа туристаш тIаийбарах йола ха, нах цунга дукха хьийжа бале а, юххера а хьайийлай. Из хьаелаш август бетта 1 дийнахьа цхьана шиъ вIашагIкхетар дIадихьар ГIалгIайчен туризмах йолча комитето – «Наедине с природой» яха экотуризман фотофестивали, «От башни к башне: Таргим – Магас» яха велопоходи. Уж вIашагIкхетараш хургда аьнна цох бола хоам баьбар оаха мехкахошка июль бетта 18 дийнахьа араяьннача «Сердало» газета номера тIа.

ГIалгIай Мехка карантин бахьан долаш хийцца лелайиш цахиларах дола доазонаш дIадахарах дола кхоалагIа дакъа маца хургдолаш да мадарра ховш деце а, август бетта 1 дийнахьа туризма ха хьаела лаьрхIар комитета викалаша.
«Наедине с природой» аьнна дIайихьача фотоконкурса чаккхе цу дийнахьа йир оаха. Цига дакъа лоацаш шоай балхаш хьатIаахийта 20 саг вар. Царех кхоъ саг белгалваьккхав царна лерхIаме совгIаташ декъарца. Котало яьккхагIчарех хьалхара моттиг яккхачун 30 бIаьтума ахчан сертификат деннад, шоллагIа моттиг яьккхачун – 20 бIаьтума сертификат, хIаьта кхоалагIа моттиг яьккхачун «Арамхи» курорте мах а боацаш салаIа шиъ дии-бийсеи даккха йиш йолаш сертификат деннад», — аьнна дийцар ГIалгIайчен туризмах йолча комитета пресс-секретара ГIулой Жаннетас.
ТIаргамара бола а бенна Магасе ягIача Барта-ГIалага кхаччалца никъ беш хилар велосипедаш хоахкашбараш. ГIулой Жаннетас яхачох цига дакъалоацаш 74 саг вар, саготалла велосипед хахка ваха а, вешта ший низъоамала даькъе къахьегаш хиларца велосипедаш хехкараш а, царна юкъе кхыча мехкара хьаьший а бар.
«Велосипедаш хоахкаш хиннача доакъашхошта юкъе вар Пятигорскера вена хьаьша. ГIалгIай мехка хьавоагIаш ший велосипедаца 150 км совгIа никъ баьб цо. Цул тIехьагIа ТIаргамара вола а венна Магасе Барта-гIалага кхаччалца 76 км кхы а никъ баьб цо цигара IобоагIача велопохода доакъашхошца цхьана. Кагий нах а, кIаьнкаш а дика баьхкар наькъа, цхьаккха саг ца къасташ. Тхо раьза долаш дика чакхдаьлар из вIашагIкхетар», — аьнна дийцар пресс-секретара ГIулой Жаннетас.
Туризм йолаенна йолаш лоам чу нах дукха ухаргба – мехкарабараш а, доазол арахьара тIабаьхкараш а. ХIаьта вай мохк, вай лоаме цIена латтаргйолаш, воашта тIехьа нувхаш ца юташ, тIабаьхкачарга а оамалца хила оалаш лостам болаш хила деза вай.

Матенаькъан Илез