Къаьстта йолча проекташца белгалйоахаргья гIишлош

2021 шера денз дIахо кIезиг-кIезига хувцаш цхьан тайпара амат дола мехка гIишлош хувца лерхIаш да ГIалгIайчен Iаьдал. Цу хьаькъе къамаьл дир ГIалгIайчен Мехкадас Келматанаькъан Макшарипа Махьмуд-Iаьлас Турцера баьхкача инвесторашца хиннача вIашагIкхетаре. Цох бола хоам бу ГIалгIайчен керттерча кердадарий сайто.

«Мехка Минстрояцара хьакъоастаяьй оах архитектурани шахьарашйоттарахи йола комитет. Цул совгIа, болх беш («НПО «Геопроект» – прим.) яха проектни институт а я. ХIанз ГIалгIайчен аматага хьажжа тхоашта ловча тайпара вахара гIишлой проекташ увттае а, юкъара лерхIам болча гIишлой проекташ яха а йиш йолаш да тхо, кIезига лаьтта дараш а цу чу чуйоагIаш», – аьнна белгалдаьккхар Макшарипа Махьмуд-Iаьлас.
ДIахо ше къамаьл деш Мехкадас тIатехар, 2021 шера гIишлой проекташ кердаяхара гIулакх духхьал мехка керттерча шахьаре хинна Iергдац, аьнна. Иштта боарамах къаьстта йола проекташ йоахаш болх бергба берригача мехка гIолла а. Ала деза белгалдеш ма хиллара, из болх цхьан юкъа чехка кхоачаш бе вIаштIехьадаргдац аьнна, цу гIулакха мехкал арахьара кхы а ахча хьатIада дезаргдолаш хиларах а.
Из доацаш, мехка хьалйоттача гIишлошта юкъе дукхагIа кирпишк дIаяхийта лерхI, цунца цхьана мехка промышленни производстваши иштта кхыйола юкъара-экономически гIулакхаши дегIадоладе аьттув хургболаш.

ГIалгIайчен Правительствос беча хоамах ГУП НПЦ «Недра» яхача юкъарченца дIахо болх беш йолча «Геопроект» яхача Iилман-производственни цхьанкхетара керттера декхараш да проектно-изыскательски, инженерно-геологически, инженерно-экологически, инженерно-геодезически хьалаш лохаш, тохкаш дола балхаш кхоачашдарца дувзаденна. Иштта гIишлош хьалйоттаргйолча меттигашгара лаьтташ чIоагIдий-дац, гIишлон чIоагIал тахкара гIулакхаш а дизза теркал дергдолаш да.

Институте чу проектно-сметни документаци кийчьяй 5 школаи 7 берий садикаи лаьрхIа. Уж я Iаьлий-Юрт, Долакха-юрт, Йоккха Ачалкхе, Илдарха-гIала, иштта къаьстта йола ОльгатIерча школан 250 моттиг йола проект. Дешара гIишлошта яьха архитектурни проекташ кердача организационно-техническии архитектурно-строительнии декхарашца товш я. Уж проекташ хIанзле архитектурани шахьарашйоттарахи йолча комитето къоабала а яь проектни документацен реестре чуйихьа я.

Матенаькъан Илез