Лорий болх аттача боаккхаш

Россе паччахьалкхен унахцIено лораерах долча хьалех керттерачарех да тIехьарча шерашка тайп-тайпара долча наькъашкахьа кхоачашъешйолча къаман проекташца дувзаденна. Ала деза къаман проекташта тIагIолла мехка бахархой хьал тоаде аьттув боккха болга. Цунга хьежжа наьха вахара хьал ма хетта аттача доаккхаш къахьега йиш йолаш ба Iаьдала болхлой.

Къаман проект кхоачашъярца укх деношка ГIалгIайчен больницешка керда кхоачам тIабенаб унахцIенал дегIайоалаярах болча наькъаца. Уж я принтераши, скори помоща бригадашта лаьрхIа йола планшеташи. ШоллагIча этапах мехка кхоачаргйолаш я керда компьютераш, видеокамераш, монитораш. Хьа мел кхаьча хIамаш мехка районашкарча больницешка гIолла дIа-хьа екъаргйолаш я лорий болх аттача баккхар духьа.
ГIалгIайчен унахцено лораерах йолча министра гIончас Бохтаранаькъан Якъуба яхачох, мехка хьакхаьча гIо вай лорашта шоай болх кхоачашбаргахьа дикка накъадаргдолаш да.
«Укх гIулакхо лорашта аьттув лургба къаман проектах дIаовттаяь хиннача информационни технологех кхы а дикагIа шоай болх кхоачашбе. Масала, КТ яьккхача унахочун хьал архиве дIачухьоргда ший снимкаца цхьана. МоллагIча лорий миччахьа юрта ший унахо хьатIавеча архиве Iочу а ваьнна ший унахочун снимок бIаргаго, цун лазара хьал довза аьттув хургба, скори помоща планшеташка гIолла гургда шоаш оарцагIа баьхача унахочун лазара корта. Цу хIаманца лорий болх дика а аттача баргба».
Къаман проектаца беш бола болх нагахьа санна паччахьа хьалхашка овттадаь декхараш мадарра кхоачашдирца хьинаре къахьегаш ма хетта дIачакхбоаккхе цох мехка бахархошта доккха гIо а совгIат а хургда. Амма, бе боагIача тайпара болх кхоачаш а ца беш, гIулакх талмаста дуте халкъа а Далла а хьалхашка жоп дала дезаргда цу гIулакха бехктокхаме мел хинначун.

Матенаькъан Илез