Ловца боаккхача хана деча гIалатех

Сага моллагIа дикахетар хилча, е цунга моллагIа цхьа хIама кхаьчача, е цунна совгIат делча ловца боаккхаш оамал я вай. Цул совгIа, вай геттара дукха ловцаш доах саг ваь ди хилча, саг йодаш-йоагIаш моттиг нийсъелча е сага тIадувха барзкъа ийцача. Из саг дега кхоачарах мел ва дукхагIа а чIоагIагIа а доах вай цунна ловцаш. Ловцаш дахар а, сага дикахетаргдар алар а дикагIйолча оамалех оамал я. Цунна ловца баккхарца хьагучадоаккх вай из воашта дукхавезаш хилар а, цунна дикадар хилар ловш воаш хилар а. Из мел дола хIама дика да, амма уж ловцаш доахача хана наха къамаьлагахьа гIалаташ ду. Хийла доагIаш дола дош нийса ца оттадеш дехьа-сехьа доаккхаш нийслу. Царех цхьадараш хьоахадергда вай.

Сага тIаювха хIама ийцача, е книжка яздича е из ваь ди дале из даькъала вувцаш доахача ловцашкахьа ду наха дукхагIа гIалаташ. «Дала даькъала долда хьа книжка», «Дала даькъала долда хьо ваь/яь ди», «Дала даькъала долда хьа барзкъаш» оалаш нийслу вай. Саг ваь дии, цо яздаь книжкеи е моллагIа кхы кара хьаяь хIамеи даькъала хулаш хилац. Саг мара вац даькъала хулаш. ДIахо, сагагара дIа мел ийккхача хIамах даькъала хийла аьнна алар харцахьа да.
Уж аз къовларгашка хьачулаьца ловцаш доахаш хилча «Дала беркате/пайдане долда хьа книжка» ала деза. ХIаьта саг ваьча денца даькъала вувцаш хилча, из ваь ди ца а дувцаш даькъала «Дала даькъала волва/йойла хьо» ала деза. ТIадувха баркъа е кхыйола хIама яле «Ираз долаш, дега товраца лелайойла Iа, беркате хийла» ала деза. Саг ва даькъала вувца везар, из ваь ди дац, е цо хьаяь хIама а яц. Цу мо долча ловцашкахьа кхы а да наха деш гIалаташ, уж дIанийсдар вай декхар да, вай къаман мотт цIена а нийса а хургболаш.
Цхьавола саг, Iа ше даь гIалаташ белгалдича е дIанийсдича из лоа ца луш гIаръеш, мухаш яй яппарашъеш, е йист ца хулаш дIавода. Цхьаволчо баркал оал, ший гIалат дIанийсду, тIаккха из кхыча гIалаташ дечарна а хьалхдоах нийсагIдар дIаоалаш. ЦаI-шиъ мара деце а гIалаташ цхьацца доаккхаш вай дIадоахаш хилча вай мотт хьацIеналургба. Массаза дийца, леладаь дош дита хала-м хул, дале а, сага безам хилча цо хьа ца деш, Iома ца деш хIама дисац. Безамца дувзаденна да деррига.

Матенаькъан Илез