Наьха синош кIалхардоахаш

Укх деношка, ГIалгIайчен цIий дIа-хьа доттарах йолча станце хоам а баь шоаш дIабехарца цига баха шоай цIий дIалуш, доккхача ногIалга дакъалоацаш хилар ГIалгIайчен кагирхой гIулакхех йолча комитета ткъаьх доакъашхо. Даьла духье еча наха шоай боча цIий дIа-хьа дотташ хиларца миллионаш могаш боацача наьха синош кIалхардоах валара. Цу даькъе доккха дакъа дIалоац мах моацаш шоай цIий дIалуш болча гIончаша – волонтераша.

ЦIий дIалуш дIадихьача ногIалга массайола короновирус бахьанце латтача эпидеме бокъонаш лораеш хилар. Белгалъяьча хана чухьа лаьрххIа цхьацца саг мара чакх ца воаккхаш болх бир лораш волонтерашца, наха юкъе хила беза бустама боарам лорабирца. Станце дIачу ме бахачарна температура юсташ, кульгашта дезинфекци еш, мIаьжг, бахилаш, кий иштта кхы эшаш бола кхоачам лора.
Эшаш долча цIийна кхоачам хургболаш ханнахьа из дIадалар чIоагIа эшаш гIулакх да аьнна хеташ ва комитета гражданско-патриотически отдела хьалхара говзанча Галайнаькъан Назир. Цо яхачох кагирхоша чам а болаш дакъалоац мехкахошта гIо дарах долча ногIалга. «Оахош хьабийхача кагий нах хьабахкар белгалде чIоагIа хоза хета сона. Безам ба тха укх коронавируса юкъе гIолла атта доацача хана цIий эшаш болча вай мехка бахархошта гIо де. ЦIий дIадаларца цхьанне мукагIа са кIалхардаккха чам ба. Мехка дарбанчешка хIанз чIоагIа эшаш да цIий, цудухьа лерхIам болаш да хIаране лоацаш дола дакъа. Дукхача кагирхоша цIий дIадаларах долча ногIалашка хьинаре дакъалоац дукха хана денз», – йоах Назира шоай ногIала раьза волаш.
Доноврство яха хIама цIий дIа-хьа доттарца наьха вахар кIалхарадоаккхаш гIулакх да. Коронавирус яха у бахьан долаш карантин латте а, цунгахьа овттаяь бокъонаш лорайирца дIадала йиш йолаш да цIий, моллагIа ший безам болчо. ГIалгIай массаза а хиннаб сага цхьа хIама тIакхаьчача, цунга бала беча, е хатар хилча цу сахьате цунна оарцагIабовлаш, цун кIалдисар хьаллоацаш. Цудухьа цу мо долча ногIалашка дакъалацар, цIий дIадалар гIалгIашта юкъе даржаш а даьржа хила дезаш а гIулакх да. Цул совгIа, гIо эшачоа новкъостал дар, кIалвисачунга хьажар, цамогаш волчоа дарба лахар – из геттара маьл болаш гIулакх да.

Матенаькъан Илез