Ший къам, мохк дукхадезарца

ГIалгIай истингаш гулдеш, уж юхамалха доахаш, цул совгIа, уж хьаде нах Iомабеш школа а йилла хьинаре къахьегаш йола Iилманхо, этнограф Дзовранаькъан Танзила ГIалгIай мехкарча дукхача наха йовз. Массехказа оах статьяш язъяьй цун балхах лаьца, цудухьа «Сердало» дешархошта цун балхаш довз аьнна хета сона. Кхы вIалла болх ца бича а кхоачам болаш боккха болх ба, дукхача шерашка гулдаь, къахьийга, вIашагIтеха цо кепатеха «ГIалгIай гIарчIош» яха книжка. ГIалгIайчен а, еригача Кавказа а, моллагIа гIарчIошца чам болаш волча сага а, доккха совгIат хилар из болх арабаьнначул тIехьагIа. Со-м хIанз цох дувца валац.
Facebook яхача интернет сета чу ший оагIон тIа Дзовранаькъан Танзилас язду хозача ший балха бесаех тешаш боацача нахага, вай мехкарча Iалама бесаех цаI гойташ:

  • Тхога цкъаза оал, цхьадола истинга е хеттача ферта бесаш Iалама юкъе хулашдац аьле. Шоана гойт безам ба са ГIалгIайчен лоамашка хьахулаш болча шиша зизтохар. Тханах даьча тха кIувсашка лоам а ваха хьожача хана мара кхеталуц, фу бахьан долаш деш хиннад уж вай ноаноша иштта къаьгаи сийрдеи. ГIалий тайшача беса пенашта юхе геттара хоза тов истингаш, – йоах Танзилас.
    Ала деза Дзовранаькъан Танзилас цу истингашцара болх лелабу дукха ха йолга а, дIахо кхы а, вай ноаноша лелабаь из болх гIалгIай къонача ноаношта юкъе дIа-хьа боаржабеш хьинаре из къахьегаш йолга а. Мел кIезига дале а хьадича хIама хьахул. Из Танзилас дика гойтад ший хьинарца, говзалца, ший къам, мохк дукхадезарца.

Матенаькъан Илез