ЗIамига юрт сийрдаяргья

Вай республика кулгалхоша лаьрхIа теркам тIабохийт юртара вахар тоадара. ГIалгIай мехкарча кховзткъа юрта юкъе эггара зIамагIчарех яь Чималхе. 1920 шера Iойилла къаьна юрт я из.

Чакхдаьннача шера Культура цIа хьадийла дика кхаъ хиннабар юртахошта. Укхаза вахаш цхьа эзар ши бIаь совгIа саг ва. Цхьа дезал санна барта бах юртахой. Шевар аравоал юртара кхоачамбоацараш дIадаха. Бокъо йоацача моттиге гулбаь нувхий ши гув дIа а баьккха, лаьтта аьхад. Йокъаенна гаьнаш дIа а яьха, керда гаьнаш дIаегIай юртахоша шой низаца, иштта таро йоацачунна цIа тоадеш ремонт яьй. Юрта администраце кулгалхоша ца хаддаш теркам бу юрт тоаяра. Шаьрдаьд наькъаш, чудиллад хий. ХIанз улицаш сийрдаяхара болх дIахьош ба. ЧIоагIача аьшка корпусаш йола шовзткъа светодиодни фонарь йогIаргъя улицашка. Сердал дукхагIа луш яраш органезацешта хьалхашка йогIа лаьрхIад цар.

Бакъда, ишкол зIамига хилар бахьан долаш, бархI класс яккха мара таро хилац дешархой. ДIахо деша кхыча юрта дIааха безаш хул. ЗIамигача школе еррига а кхоъ классни кабинет мара яц. Школе уха дукхагIа дола бераш мукъача хана Культура цIагIа хьайийлача кружокашка ух. Царна пандар, халхар Iомадарал совгIа, спортивни, шахматни, кхыйола а кружокаш я укхаза хьайийла.

ДIа-хьа хьежача хоза хьунаш, шаьра аренаш – Iаламо хозъяча моттиге улл Чималхе.

Доахан, жа дажа шортта раьгIенаш я. Цудухьа хIара коа да хьайбаш, котамаш, москалаш, нокхарий. Иштта беркате къахьегаш, барттайна бахача юртахошта, улицаш сийрдагӏа мел хул дегашта кхаъ хургба аьнна хет сона.

БЕКНАЬКЪАН Лейла