Skip to main content

«Ангушт» команда ловзархой, астраханерча командаца яхье балара цига дIабахача, ийшар

Назрановски «Ангушт» ийшар «Астрахань» футбольни клубаца ловзаш, СКФО-ЮФО даькъа тIа 3-ча лиге Хьалхлен чуйоагIаш дIахьош хиннача яхьашка.

Матч дIахьоча хана, вай команда дIаяха хилар, А. И. Колосова цIерагIча стадионе Астрахане. Яхьаш йистеяьлар 3:2 чот йолаш, вайгахьа эшам болаш.

«Ангушт» команда шозза бургац чуяьккхар, уж бар: Аьленаькъан Бекхан, Гугуев Мухьмад. Из нийсделар яхьаш дIайолаеннача 67-77 миноташка.

«Ингфутбол. ру» яхачох, таханара котало яьккхачул тIехьагIа, «Астрахань» командага 24 очко хилар, из цу тайпара турнирни мугIаре йиълагIча моттиге эттар.

«Ангушт» 21 балл а йолаш, пхелагIча мугIаре йиссар. АргIанара матч назрановцаша дIахьоргья 23-ча дийнахьа, тов бетта, «Волгарь-М» астрахански командаца, цига дIа а баха.

Эггара лакхагIча мугIаре латт хасавюртовски «Победа», цунца ловзаш, укх деношка, вай команда, судахой нийсхо ца хилар бахьан долаш, цу яхьашта юкъера араяьлар.