Skip to main content

Лоамарой халхара йиш дIаязъяь композитор

Балакирев Милий Алексеевича 185 дизарга

Массанена дукха езаш а, каст-каста хозаш а я лоамарой халхара йиш. Дуккхачар цун мукъамца халхара бIал баьккха а хургба, вай мехка cаг йоагIача, йодача ловзар хилар бахьан долаш. Бакъда дуккхачарна хац из йиш ноташ тIа дIа а язъяь, дерригача дуненна дIайовзийтар эрсий композитор Балакирев Милий Алексеевич волга. Хетаргахьа, цунна дукха езаш хиннай Кавказ, цун сийна лоамаш, кхыдола Iалама сурташ. ЛаьрххIа лоамарой мехка вена а, из бIаргабайна а хиннав Милий Алексеевич.

Мичара хиннав из ше, мишта хиннад цун вахара шераш? Балакирев ваь хиннав 1836 шера декабрь бетта 21-ча дийнахьа (1937, 2 январь) Нижни Новгороде. ЗIамига волча хана денз, яьшкпандар (фортепьяно) лакха Iомавеш, цунца къахьийгад нанас. Иштта тайп-тайпарча ашархоша урокаш луш хиннай цунна, кхувш воагIача хана, дIахо цо дийша хиннад Москверча а Нижни Новгородерча а ашарий доврянски институте. Казанерча университета математически факультета хьехархошка ладувгIа ухаш а хиннав из. Ше а, ашарий урокаш телаш, къахьийгад цо. Цунна вовзаш хиннав гIорваьнна эрсий композитор М. И. Глинка.

Балакирева а цун новкъосташа а Питере хьайийлла хиннай, берашта лаьрхIа йола, мах тела ца беза ашарий школа. Цун директор волаш, цхьа ха яьккхай цо. Цул совгIа, из паччахьан копелланна кулгал деш а хиннав.

Балакиревс дIаязъяь лезгинка шерра йовзаш я вай мехка а цул арахьа а. Цох пайда ийцаб дуккхача культуран вIашагIкхетарашка, цIайшка, концерташка. Кхыметтел кинорежжисёраша а шоай исбахьален фильмашта юкъекхихьай из, цо уж хоздергдолга ховш. Масала, С. Жгенте сценарех режиссёра Резо Чхеидзес даьккхад «Салтечун да» яха кинофильм, Махарашвиле роль ловзаеш ва Закариадзе Серго. Цу фильман хозагIйолча моттигех цаI я, артисташ тIем тIа бахкар, ловзар оттадар. Цига екар я Милий Алексеевича дIаязъяь лоамарой халхара йиш.

Балакирев кхелхав 1910 шера, амма цо дIаязъяьча лоамарой халхара ашаро даим а дагалоаттавергва из Кавказерча къамий культура, ашараш, халхараш мел дезача наха.