Берий театро керда, гIалгIай меттала спектакль кийчъеш латт. Ловзарий йовхьамаш дIайийкъай, уж Iомаеш ба уж тахан.
«ЦIаьрмата бIухо» яхача Пушкин Александра даьча йоазох спектакль оттаер ва режиссёр вола Лаьнанаькъан Ахьмад. Берий театре цун хьалхара болх бац из. Лакха начIал долча режиссёра кердача хьисапе хьекхар хьажархошта Островский Александра язъяь «Ди тохар» яха пьеса.
Вайна дагайоагIа воккхача йоазанхочо даь из йоазув. Цу чу дувц, цIаьрматало нахацара бувзам, барт мишта бохабе йиш я. Хийла саг хувцалу ахча каракхаьчача. Дог дика, кIаьда саг а цхьайолча хана ахчанцарча безамо геттара бирса, къиза ву. Ишттача сага цхьаннеца бала хилац, духхьал ший рузкъа Iоадарца мара.
БIухо волча Альберта чулаттача сагага лоткъаву ший да, геттара цIаьрмата ва из, яхаш. Даьна вIалла а гаргайита магац, ше дIаваьлча, хьашт долчча тайпара дохка ший рузкъа воIа дусаргдола уйла. Из дагадехача, геттара хьаьрвоал из.
Иштта во хIама я цIаьрматал. ДIахорадар хьажархошта довзаргда тха театре хьабаьхкача», — аьлар театра болхло йолча ПхьаргIалнаькъан Марианнас.
