Skip to main content

Бурох Орджоникидзе цIи тиллар

Владикавказ оалаш хиннача шахьарах, нийсса 90 шу хьалха (1931-ча шера) Орджоникидзе гIала аьнна цIи тилла хиннай. Из цIи цох тиллар кхетаде хала а дац, хIана аьлча пролетаре баьчча хиннача В. Ленина, лаьрххIа декхар тIа а дилла, Россе къулбехьен Чрезвычайни комиссар а ваь, укхазарча революционни болама а Граждански тIема а кулгал де вайта хиннав из. Цу ханах а гIалгIаша мел боча хеташ из лелаваьв а дувцаш я цунна уллув лийннача революционера, йоазонхочо Гойгов Сипсой Iаддал-Хьамида язъяь «Серго» яха повесть. Духхьала гIалгIай га даьккха ца Iеш, Кавказе мел дахача зIамигача къамий болхлойи ахархойи оагIув хинна дIаэтта хиннав из. Цун хьалхаленца бохабаьб инарала Деникин Антона бIу а.

Советий Iаьдал хувцалуча 90-ча шерашка, цун цIи дIа а яьккха, къаьнара Владикавказ яха цIи тиллар шоай столицах лоалахарча ХIирий Республикан хьакимаша. Амма гIалгIай мехка цунца хинна безам, тешам хIанз а бицбаланза ба. Шерагара шу мел доал, цунца хиннача вай къамах болча наьха керда цIераш гучаювл. Довз керда каьхаташ, сурташ. Масала, хIанзалца Нальгиев Мандречун куц-сибат йоазонхоша дувцарах мара довзацар вайна, хIанз цун а цун дезала а сурт гучадаьннад интернета чу.

Дукха ха йоацаш Мужечарча С. Орджоникидзе цIерагIча музеера корадаьд сона цхьаькха сурт а. Цу тIа латт кхо саг: хьалхашка Iохайна вагIа О. Арчаков, аьрдехьа уралатт Э. Арапиев, аьттехьа — А. Киев. Цу тIа вагIа Арчаков Эсолта Осман са даь-да ва. Мел дукха каьхаташ яздарах, ше Орджоникидзена уллув хиннача нахаца лийннав яхаш дувцарах, из дIатIаэца тиганзар цу ханарча Iаьдало. ХIанз гучадаьннача цу сурто тешал ду цо дийцар бакъхилара. Цхьаькха сурт а гучадаьннад из венначул тIехьагIа, цу тIа ба 30-ча шерашка гIалгIай мехка колхозий председателаш хинна нах. Эсолта Осман цу тIа эггара хьалхашкахьа вагIа. Из ше тахан воацаш ва, 1976 шера май бетта ( ший 86 шу даьннача хана), детта ца луш, сецар цун дог.