Skip to main content

Ерригроссийски яхье дакъа лоацаш ба наьсархой

Чакхбаьннаб эрсий культурах йолча сочинене районашкарча дешархошта юкъера къовсам

Цхьа бутт гаргга ха я вай дахача Россерча школашка дешача берашта юкъе дикагIа сочинени язъяра яхь дIакхайкаяь. Шин тайпара лостам болаш ба культуранна хетабаь из йоазон болх. Хьалхара лостам — хьай къаман культурах эрсий меттала; шоллагIбар — эрсий культурах гIалгIай меттала. Укх деношка чакхдаьннад цун районни дáкъа. Дешара Наьсарерча урхаллено техкад цунна юкъе дакъа лоацаш хиннараша яздаь балхаш. Берригаш 28 болх хиннаб тайп-тайпарча юрташкарча школашкарча, Лоаман кадетий корпусерча дешархоша кхеллараш. ТIехьарча хана хьинарегIа дакъа лаца болабеннаб цу тайпарча яхьашка Буро кIалхарча,  ТIой-Юртарча,  Яндарерча, Эккажкъонгий-Юртарча,  Iаьлий-Юртарча,  Пхьилекъонгий-Юртарча,  Сурхо тIарча школашка деша багIараш.

Эрсий культура а Россе дахача къамий культураш а Iалаьмате йIаьхий а хоза а я. Царна чудоагIа литература, театраш, кино, цирк, ширача заман чухьа лелабаь а тахан лелабу а тIабувхабу гIирс, халхараш, иллеш, ашараш. Духхьал цхьа кино хьаийцача, из чулоацаш арадаьнна «Кинон бIаь шу» яхаш книжка да. Балета хетадаь бIарчча энциклопеди да. Ала деза, цу тIа вувцаш вай мехкахо, Пермерча театре болх баь, хIанз селий мехка къахьегаш вола Оздой Муса хилар. Культуранна чуйоагIа эздела дешашца ювзаенна моттигаш а. Мел тамашийна а кIоарга маIан долаш а хиннад вай къаман кагийча наха, мехкараша воккхагIвар лархIар, даь-наьна сий дар, саг ехар, нускал цIадоаладар, захалаш лархIар, кхы а массагIа да уж.

Наьсархошта юкъерча яхье котбаьннараш белгалбаьннаб. Хьалхара моттиг яьккхараш бархI саг ва. ГIалгIай культура эрсий меттала хьагойтарашта юкъе толаш хиннаб Кхоартой Лейла (Буро кIалхара № 1 йола СОШ), Албохчанаькъан Омар (Лоаман кадетий корпус), Коазой Мухьмад (ТIой-Юртара № 4 йола СОШ), Циздой Мухьмад (Эккажкъонгий-Юртара № 5 йола СОШ). Эрсий культура гIалгIай меттала йийцарашта юкъе хьалхле яьккхай Муцолганаькъан Хаде (Сурхо тIара ООШ), Хутенаькъан Адама (Лоаман кадетий корпус), ГIоандалой Раянас (Яндарера № 2 йола СОШ), ЧIасанаькъан Фаризас (Яндарера № 3 йола СОШ). Кхы а итт сага шоллагIа, кхоалагIа моттигаш яьхай, юхебисараш дакъа лоацаш хиннараш санна белгалбаьхаб. Уж а итт саг ва.

Сатувса безам ба, наьсархоша республике хургйолча а мехка хургйолча а цу яхьашка цхьадола толамаш доахаргхиларах.