Skip to main content

Чемпиона боарамтIа боалаш латт гIалгIай «лоIамерча латарах» бола спортсменаш

ЛоIамерча латарах болча спортсменаша 2021- ча шера беллгала толамаш доах

2021- ча шера лоIамерча латарах дIахьоча яхьашка дикка говзал гойташ толамаш даьхад, -аьнна хоам бу «Сердало» газетага вай спорта министерства пресс-службо.

Ховш ма хиллара, хIама хьадечунна мара дац. Даима къахьегаш, говзал лакхъеш, боаккхагIа болча тренераша беча балха тIехь дика толамаш даха таро хиннай.

ГIалгIайчен спорта министра советника, ГIалгIай Республика спортивни латарах вице-президент волча Мусаев Мухьмада лакха мах оттабу цу балха.

"Пандемия долаш 2020 — ча шера спорта гIулакх массехк тIехьашка даьнна хиннадале а, тхо спортсменаш тIехьа тетта Iийнадац, халача хьалашка баь а спортацара болх бе хьежаб, 2021- ча шера лаьрхIача яхьашка кийчо еш. Цу юкъа дикка къа а хьийгар, ахчанца таро а лаьгIянзар, цудухьа толамаш гуш да- 2021 — ча шера хьалхара спортивни итта ди цIаккха ца хинна толамаш дахарца дIадихьар. Со тешаш ва республике лоIамера латар кхы а чIоагIагIа дегIадоагIаргда аьнна. Эзараш кегий нах безам совбаьнна хургба царна тара хилара.

Тахан ГIалгIайчен спортивни лоIамера латар кхы а лакхагIча боарамтIа латт. Россе первенства котало яьккхай Смоленске дIайихьача 23 шу даьннача кегийча наха юкъе Галай Вахита. Цу первенстве Йовлой Мухьмада дото призёр хилар. Февраль бетта Галай Вахита цхьаькха совгIат даьккхар-из Киеве дIайихьача халкъашта юкъерча турнире геза призёр хилар.

Кхоартой Ислама дошо мейдалгеи, иштта дунен хьалхленна, Иркутске дIахьоргйолча Россе первенстве дакъа лаца бокъо а ялар. Россе Хьалхаленна геза призёр хилар 16 шу даьннарашта юкъе Шакринаькъан Iаьла.

Подмосковерча Наро-Фоминскера Шакринаькъан Акромата I6 шу даланза барашта юкъе хиннача Россе Первенстве геза мейдалг ера.

Из доацаш СКФО Первенстве 16 шу даланза болча спортсменашта юкъе Чаненаькъан Шамила хьалхале яьккхар, иштта дото медалгаш яьхар Джамбулатанаькъан Мухьмад-Амина, Шакринаькъан Акромана.

18 шу даланза болча спортсменашта юкъе Россе Первенствах вай сборни дото а дошо а мейдалгаш яьхар-шоллагIа моттиг яьккхар Имагожанаькъан Алисхана, кхоалагIа моттиг Илинаькъан Iадсалама.

СКФО первенстве 18 шу даланза болча кегийча наха юкъе пхиъ мейдалг яьккхар вай спортсменаша — дошо мейдалг Цхьорой Мухьмада, дото мейдалг- Гелисханаькъан Абдула, геза совгIат Имагожанаькъан Алисхана, Тутайнаькъан Мухьмад-Башира, Газиканаькъан Ислама.

Май бутт дIаболалуш Хоаной Мухьмад-ТIахIира Владикавказе дIайихьача шоллагIча этапа пхелагIча ахкан Спартакиаде котало яьккхар.

Хоам бу 18 мае шинарча дийнахьа, Галай Вахит латаш ва Македоне дIахьоча Европа Первенстве 23 шу даланза болчарна юкъе.

Белгалдаккха деза, дешара-тренировочни сборашка Россе сборни чувоагIаш ва Шакринаькъан Iаьла, Шакринаькъан Акромат, Кхоартой Ислам, Бохтаранаькъан IадрохIман. ГIалгIайчен лоIаме латар кердача боарамтIа латт ала йиш я, цо таро хулийт вай бахархой диканга сатувса, котало яккхарга хьежа.