Skip to main content

Сихача чархий тата

«ЧIагарг» яхача сиха лелача цIермашено боккха аьттув баьб бахархошта

Дукха ха йоаццаш, Крыме, шоай гаргара нах болча ха яьккха баьхкача бовзарашца къамаьл хилар са. Дийцар цар бихьача наькъах, дIа-хьа водаш нийслуча цхьаццадарех, тахан миччахьа ваха аьттув болаш хиларах.

ЧIоагIа дега тоам беш хилар, Назрань-Минводы маршрутах лелача «ЧIагарг» яхача вай, сиха лелача цIер машина нах раьза хилар. Берригаш чIоагIа гIадбаха бар аттеи, цхьаккха хIама новкъа доацашеи шоаш сиха дIа-хьа баха.

Тхьовра аьннача бесса, наькъа йоаеш йола ха хIанз «ЧIагаргаца» шозза кIезигагIа хул. Ваханза варгвоацача гIулакха аравалар совгIа, иштта сиха лелача цIермашенаца арахьарча меттигах бIаргтоха а, нах бовза а ваха безам хул.

Масала — «Прохладная», «Котляровская», «Аполлонская», «Георгиевск» яхача станцешка. ДIауйла йича, Париже тIехьа кхоач вай дунен тIа дахаш, бакъда, Къулбаседа- Кавказ йовза ца кхувш дус.

Из нийса хетац сона. ХIана аьлча, укхаза дукха хоза меттигаш я, начIал долча, цхьацца хIама кхолларца къахьегаш болча наьха шоай уйлаш сомаяха, кердаяха аьттув ба. «ЧIагарг » хиларах доаккхал а деш, арабовла беза уж беркате меттигаш йовза.

Дахаш, вай зийна хIама да, цхьа кIеззига дIаарахьа ваьлча а тоам хулалга керда нах бовза, доттагIал тасса, цар вахарцара къоаргленаш зе. Духхьал цу гIулакха арабаьнна лелараш, хIара шера дукхагIа болга зийнад эксперташа. Геттара дика хургда, царех дукхагIа бараш вай мехкахой хилча.

Ший хьалхара никъ бе из цIермашин арайоалача дийнахьа, Мехкдас Келматанаькъан Махьмуд-Iаьлас геттара хоза, доагIаш аьлар цу гIулакхах: «Е таханара аьттув боккхагIчарех ба аргдар аз. Ма дарра аьлча, совгIат да ер цIермашен. Вай бахархой хIанз паргIатагIа хургба, деша багIаш дIа-хьа ухача студенташта а аттагIа да. Цул совгIа, туристашта а боккха аьттув ба таханара ди».

ТIехьа тIа йоагIача хана " Сунженская" яха станци хьаела лерхIаш ба хьакимаш " ЧIагарг" Шолжа-пхьера а ухаргйолаш. Теша лов, 2022 шера, коронавирусни инфекци юхаяргья аьнна.

Цу хьало аьттув лургба наха паргIатта шоай дегашта салоIам беш, гонахьара хоза меттигаш йовзаш лела. ЦIермашен мел эшача хIаманца кийчо яь я. Фо цIендеш йола климат-контроль йоал, дIа-хьа кхухьача йоккхача хIамашта лаьрхIа къаьстта меттиг я, иштта, дегIа могашал эшаеннарашта лаьрхIа, царна атто еш кхоачам ба.

Кхерамзле лораяра гIулакх а теркаме лаьцад, бераштеи боккхийча нахаи льготаш я. Цхьан дешаца аьлча, лакхача боараме кийчо яь я цIермашен. Тахан цо вайна луш болча аьттонах, беркат эца деза вай.

Вайх хIаранега кхоачаш доккха дика да «ЧIагарг».

Пайда эца вай цох, тIаккха, хьамсара мехкахой.