ДIадахача шерга хьежача, укх шера цIа, квартира лацара маьхаш дукха айденнадац. Из хьахьекхар тха газето дIабихьача тохкама балхо.
«2023-ча шерара маьхаш, вай республикерча йиъ шахьарера хьал теркалдича, кхы дукха башхо йоацаш, дIадахача шера лаьттача тайпара да. Масала, Магасерча бахархоша шоай доалахьара квартираш нахага дIател, мах 15-25 эзар сом доаккхаш. Квартирий йоккхалга, дикалга хьежжа оттаду маьхаш».
Ишттача хьале латтар из гIулакх 2022-ча шера а. Цу гIулакха болча болхлоша яхачох, тайп-тайпарча моттигашка, цкъа айлуш, тIаккха юха Iолохлуш, хувцалуш латт квартирех тела мах. Цу гIулакхаца дувзаденна долча экономически хьалага хьежжа да деррига а.
