Skip to main content

ЛийрхIар хиннадац, дегIар мара

ЦIермашений кердача вокзала вахарах лаьца

Укх шера нийсса 25 шу дуз, вай республике дуне миссел йоккха цIермашений вокзал хьалъяь. Керда хьахиннача республике эггара хьалха хьалъяьча гIишлонех цаI я из. Из еш латташ, цига хинна а шедар сай бIаргашца бIаргадайна а ва со. Дукха томаш йола сома книжка санна яр, Словакерча Нитра яхача шахьар тIарча архитектораша оттаяь хинна цун проект. Из Iомае, кхетае сахьаташ а доахаш вагIа везар. Из еррига чоалх вIашагIйоллаш хиннараш а цу гIалий тIара гIишлонхой бар. Чура чувоалаш массийтта блок яр вокзала чуйоагIаш. Цар тхов кIалха хила дезаш дар наькъа арабаьннача наьха хьашташ кхоачащдергдола шедола хIама. Масала, ден-бус болх беш йола йиъ касса, мухь дIачутела отделени, почтамт, шахьарашта юкъе бувзам лоаттабу телефонни станци, ресторан, лорий кабинет, наьнеи береи цIа, кIаьдвалар (психически Iоткъам) дIадоаккхаш, син сатем бахьаш йола кабинет, кхыдараш.

Оалаш ма хиллара, лийрхIар хиннадац дегIар мара. Ший ткъаь пхе шерага вокзал кхаьчача хана, лакхе дийцарех дуккхадараш укхаза доацаш да. Хетаргахьа, из дувзаденна да дуккха нах тIа ца латтандаь. ХIанзарчоа укх новкъа лелар Наьсаре-Москва оала цхьа цIермашен мара яц. Из лела йолаеннай, 2014 шера денз. Бакъда сентябрь бетта Наьсаре-Минводы яха сиха лела цIермашен а хургья яхаш да, укхаза хозаш дола къамаьл. Из «ЧIагарг» аьнна цIи йола цIермашен Москве ухар санна Россе столицан цIерагIа лелаш хургья.

2019 шера кхаччалца, цIермашена вокзал ювцача гIишлон чу арендах Iеш яр, Росимуществон мах телаш. Цу шера 1100 квадратни метр наха Iеш йола зал, мах тела безаргбоацаш, вокзала доалахьа хьаеннай. Цига денз дIа мел ийккха хIама цIермашена вокзала кулгалхой доалахьа дац укхаза. Ала деза цун тайп-тайпарча блокашка 19 организаци Iеш я аьнна. Масала, царех я Росимущество, Наьсарен райсовет, КПРФ вай республикера отделени, кхыяраш.

-Из зал тхоай доалахьа хьаенначул тIехьагIа, — йоах вокзала кулгалхочо КIаценаькъан Мурада ИбрахIима, — оаха тоадайтад наьнеи береи цIа, хIанз цу чу мебель оттае еза тха. Лифт тоаяьй, кулг-юхь дилара, аравахара эша моттигаш меттайоалаяьй, 70 процент пандусаш яь яьннай. Иштта дийнахьа болх беш ши касса я, дукха ха йоацаш хьайийллай къаман даараш кийчдеш йола кафе. ХIанз перронаш тоае лаьрхIа да тхо.

ИбрахIима укхаза болх бу дукха ха я, къаьнара вокзал йолча хана денз (1995). ХIанз ялхлагIа шу да из укхаза хьаким вола. Верригаш цун карара болхлой 15 саг ва. Москве уха цIермашен кхыча организацена чуйоагIаш я. Укхаза я АО ФПК — федеральни пассажирий компани оала акционерий юкъарло, цун даьй Москве багIа, хIаьта вайцигарча филиала керте латт Оздой Асхьаба Лом-Iаьла. Ди юккъа ухаш йолча цу цIермашенаца болх беш 54 саг ва. Кулгалхочо яхачох, уж берригаш цхьатарра дика къахьегаш, шоаех гIалат ца доаккхийташ хьабоагIа. Царех я Котаганаькъан Ахьмада Хьава, Боканаькъан Мухьмада Рукъет, Бабхой Башира Танзила, Мираненко Галина Викторовна, кхыбараш.

— ЦIермашен ди юккъа цаI мара ца леле, Наьсарера переезд каст-кастта къайла хIана хул? — хаьттар аз Мурада ИбрахIимга.

-Мухь кхухьа цIерашенаш лел укхаза, уж Прохладнера, Берса-Юртара йоагIаш хул е Сипсой-ГIалий тIа е Илдарха-ГIалий тIа кхача дагахьа. Ден-бус бархI пара хила тарлу уж. Цудухьа къувлаш я переезд.

Иштта да таханарча дийнахьа цIермашений керттерча вокзала вахар. Ткъаь пхиъ шу дукха ха ала йиш яц, бакъда кIезига ха а яц из. Вокзала хьалаш кхы а дикагIа хиларга сатувса лов. ЦIермашенаш дукхагIа лела яьлча, адамаш дукхагIа тIалатташ хилча, тоадала мегаш хIамаш да уж а.