Skip to main content

Денала эстафет

Денала орден елар вай мехкахочоа Дзангинаькъан Исроапала

Вай къаман къонахий массе шерашка вIалла хье ца луш Даьхен гIулакх лораде оарцагIа ихаб. Тхьовра лаьттача турпалхой цIера йицъеннаяц къаман, цар исторега гIолла кхувш латташ яхь йола къонахий шоаех оалийташ хьабоагIа.

Бера хана денз денал яхача деша маIан довзийташ кхебаьраш белгалла хул нийсъбенна дIаэттача. Ишттача къонгех ва Россе офицер волаш Украинерча тIема юкъе майрал гойташ хьавоагIа 24 шу даьнна Дзангинаькъан Исроапил.

«Эггара хьалха ма даггара деттача герза юкъе нийсвелча дог аьгар са кхеравенна... бакъда, со офицер ва, сона тIехьа 25 сагах латта взвод я, яхача уйлаша сиха метта воалавир. Аз мелал гойтача, сона тIехьа латтачарех фу хургда аьнна хийтар сона. Денал чIоагIдаь духьала отта везаш дар хьал!», — дийцар журналисташка Исроапила. Хозача моттиге улача Алхасте ваьв Исроапил. ЗIамига волча хана денз турпалхоех дола дувцараш дешаш, боккхийчаргара хозаш кхийнав из. Цу хана цун а ловра цу мугIарерча наха юкъе хила.

Кадетски корпусе деша оттар а цу уйлашца хоттаденна дар. Кадетски корпусера дешар тIехь дика чакхдаьккха Тюменерча лакхерча тIема-инженерни командни училище деша вахар из. Къаьстта цига деша ловш вар Исроапил дукха хана денз. ДIадахача шера ахкан тIехьарча бетта из дешар йисте а даьккха Забайкалье саперни полке дIавахар из. Дукха ца говш ше Iомадаьр дIахьокха дезаш эттар Исроапил. ТIема операцен юкъе ва из хьалхарча дийнахьа денза. Фу хургда-хьогI са вахарах аьнна хеташ моттигаш дуккха а хилар цига, бакъда, ший уйлаш IотеIаеш, тIехьа латтача бIухой дог ураувттадеш дIавахар зIамига саг. ТIема новкъосташа хьалхарча дийнахьа зийра цун деналах йизза йола оамалаш, Кавказа аренашка Iомаяь майрал. Бакъда, геттара хала дера, цIаьхха цхьа ди. Мина иккха когаш доацаш висар дог майра хинна Исроапил.

Мина осколкаша парххенцахьа дохадаьдар когаш. Цунга хьожаш хиннача лораша тамаш йора цун дегIацарча деналах, сатохарах. Метта уллашехьа сай новкъостий болча юхагIоргва со яха къамаьл дитацар цо. БIаьхача ворхI бетта Москвера, Санкт-Петербургера лораш из меттавоалаве гIерташ дарбаш деш хилар. Дарбанче Iояха гIерташ хинна нана соцайир цо, ма йола! Хье елхаргьяле ма еллах укхаза аьнна. «Наьна бIаргех Iоухача хин бIарахьежа хала да сона. Сона дезац сайх къахеташ уж бIарахьежар. Цхьаннех а къахеташ белхар дика хетац сона. Сага дог ураоттадеш хила веза, хий мехкадеш бIара ца хьежаш», — дувц Исроапила тахан. Забайкальера губернатор Осипов Александр цун гIулакха тIехьа чIоагIа бIарг локхаш хилар могаш воацаш из мел ул.

«Кастт-кастта дарбанче воагIаш, Забайкальера лозабаь бадарий хьал теркалдеш хилар из. Протезаш а эггара дикагIа яраш оттаелаш аьнна дехар даьдар цо. Телефон етташ ше хьийжар цу хIаманга сагах тийша а ца дуташ», — цун баркал оалаш дувц вай мехкахочо. Халача лазарах чакхваьнна тахан гIажаца лела Iемав Исроапил. Часте юха ваха гIерташ ший хур даьд. Кхы из ца соцаш, Белгородски тIема комиссариате болх бе Iоха, цига вагIа везаш мара хургвац хьо, хало хургьяц, аьлар цунга. ХIаьта сона хало хилча аттагIа хул! Кхыбараш а латтаций цу халонашта духьал, — дувц цо. Россе президента указах Забайкальерча губернатора Осипов Александра денала орден эллар цун. Дог тохадолийташ дар цу дийнахьа цо аьнна дешаш: «Ер тайпара орденаш сона-м дуккха а яха ловра! Син низ тел укх хIамо.

Мехка моаршо лораеш латтар хIара къонахчун тIадежа декхар да. МоллагIа долча хIаман духьала увтташ, ший моттиг лораеш чакхвала веза мехка визза воI! Со дийна мел волча хана сай мохк лорабеш латтаргва со. Денала орден — мехкацара безам, лерхIам ба!». Халахь, къаман визза вола воI, хьох доаккхалдеш ба хьона беррига гIалгIай мохк! Хьа майрал, яхь йолаш хилар, денал массанена гуш да хьона! Хьо мо бола эздий къонгаш дуккха а кхувлба укх мехка! Дала ираз долаш, аьттув болаш воахаволва хьо укх дунен чу!