Skip to main content

Наьна мотт хьехара хьал тоадеш

Дешара кхуврчашка хIара денна хIана дац аьнна юкъе доаладеш да гIалгIай метта йоазув а дещар а дегIадоаладара кердадараш

Укх тIеххьарча шерашка дукха дийцад, гIалгIай мотт школашка хьехар мишта тоадергда, малагIа наькъаш да цу даькъе пайда баргбараш, фуд цу балха новкъадар, иштта кхыдола дешаш.

Карарча хана балха юкъейоалаяь а юкъейоалаеш а я шоллагIча ноахалах йола федеральни паччахьалкхен дешара стандарташ. Цар дIадех кердача хьисапе школаша болх бар, массе оагIорахьара дегIавена саг кхевар. Цунга хьежжа хувцалуш ба дешара книжкай, уж дIахьехара гIо деш долча пособей чулоацам. ХIанзчул тIехьагIа кхолла езаш я царна йола керда дешара а балха а программаш. Керда лостамаш хьехархошта дIадовзийташ, говзал лакхъяра института болх баьб школашка къахьегаш болча нахаца лаьрххIа цу гIулакха йолча курсашка. Укх деношка из дош юха хьоахадеш моттиг нийсъелар республикан дешара министерстве. Цига белгалдир гаргарча хана 1-чеи 11-чеи классашта лаьрхIа гIалгIай меттахи литературахи дола методически пособеш, дешара а балха а программаш кийчъе езаш хилар. Из болх тIаберзабаь ба федеральни хьисапе арадоахача дешара книжкашта юкъе гIалгIай меттала дараш а хилийтара. Бувцаш бола болх чакхбаккхара ханаш хьоахаяьй. Цу гIулакхах бехктокхаме бола нах къоастабаьб.

ДукхагIдола меттах а литературах а дола книжкаш, шоай чулоацамга диллача, дикка эргадаьннад, бакъда царга хьежжа оттаяь балха а дешара а программаш яц республике, цул совгIа, уж мишта дIахьеха деза хайташ дола методически кулгал дац хIара класса лаьрхIа. ХIаране шийна бакъахьа хеттача тайпара хьех. ХIаьта методически балхаш кийчдаь, кепа теха арадаьлча, из беррига болх цхьа лостам болаш дIахьоргба, кIийленга дадаш лаьрххIа цу гIулакха могадеш наькъаш долаш.

Федеральни паччахьалкхен стандарташка хьежжа, 1–4 классашта программа кийчъяр тIадиллад гIалгIай меттахи литературахи юхьанцарча классашта волча методиста Гагиев Къурейша. ХIаьта 5–9 классашка меттахи 5–11 классашка литературахи цу тайпара программаш оттае езаш я йоккхагIйолча классашта йола методист Аушева Марем. Цу шин сага тIачIоагIдаьд ерригача классашта йола балха программаш кийчъяра декхар а.

Хала а бехктокхаме а декхар да хIара классан лаьрхIача книжкаца доагIаш дола методически кулгал яздар, кхыча дешашца аьлча, уж дIахьехара эшаш дола нийса наькъаш белгалдар. Из болх беча юкъеоза беза школашка болх баь, йоккха поалхам Iоаяь, дикагIча хьисапе къахьегаш хьабоагIа хьехархой. Царга оттадайта деза методически пособеш. Из иштта да а даьд дешара министерствос. Тайп-тайпарча классашта лаьрхIа уж язде дезача наха юкъе ба республике цIихеза хьехархой. Царех ба А. Чапанова (Наьсарера №15 йола СОШ), Ц. Мамилова, М. Саутиева (МагIалбика №5 йола СОШ), А. Картоева, Л. Хамхоева (МагIалбика №12 йола СОШ), А. Мальсагова (Наьсарера №4 йола СОШ), Л. Джемиева (ТIой-Юртара №2 йола СОШ), Х. Арчакова (Йоккхача Ачалкхера №27 йола СОШ), З. Курскиева (МагIалбикера №20 йола СОШ), иштта кхыбараш. Верригаш 15 саг ва цу гIулакха къахьега дезараш. Уж книжкаш оттадаь а арадаьха а даьлча; кердача, лакхагIча боарам тIа хургда аьнна хет сона наьна мотт, литература хьехар а; цу балха тIа доахаш дола толамаш а.