Skip to main content

Къахетаме хила!

Доал доацача хьайбашца къиза ма хила

Бусалба дог къахетамах дизза хила деза! Иштта йоах вай дино! Къахетаме воаца саг наха унзара хет. Укх дунен тӀа хьадеш мел дола дикаш къахетаме болча наьха хьинарца хулаш деций?!

Со хьоахаде гIертар-м дуккхача наха къувлаш, сатем боабаь хIама да... Ара шелал хьаоттарца, эггара хьалха дагадох цӀа доацаш лела хьайбаш, ма дарра аьлча, доал доацаш лела цискаш. Уйла е эттача, чIоагIа тамашийна да укх дунен хIама... НийсагIа аьлча, тамашийна ба-кх нах...

ЛерттIа шийна чуIе моттиг йоацача цхьаволча сага ворхIи, бархIи циск леладу хийла цIагIа. Сона сай бIаргашца дайна хIамаш да уж-м. Шоай берашта санна цар кIоригашта доал деш, цамогаш хинна циск лорашка кхувлаш, маьхий детташ, хан-ханнахьа лувчадеш, нIаний хургдоацаш молхаш мелаеш леладу. Сона йовзача цхьан кхалсага 35 эзар сом ахча Iодиллар, арара хьачуденача цхьан циска кIорига дарба деш

Кхыметтел операци тIехьа яйтар цо цунна. Доккха хIама дар, из кIориг тоаде гIерташ, хьайбай лор волча ухаш, таксех цо Iо мел дилла ахча. Ма ираз да-кх хьа Дала иштта къахетаме дог денна, аьнна, хийтар сона цо леладечун бIарахьежаш!

Бакъда сона а шоана а дика бовза хургба, Iан шелал латтача дийнахьа, дIадала бIаргагучара, яхаш, хIамаш етташ, наIаргара уж миска хьайбаш лелхадераш. Ма даггара уйла йича, цу наьха кер чу фу доалл кхета магац сона! Ай, фу хургда цу хьа цIенах, шийлача дийнахьа цискага бийса яккхийтай аьнна?! Из фусам хьайна хьаеннача Далла хоастам баь, Даьла ший духьа, аьнна, Iа из цIагIа чудитача, хьайна Даьла раьза вергвар Iа! Цхьа даладоалла циск чувхадеш, йоаллача сагага:

— ХIама тасса цунна, моцало кIал ма дитадий из, — аьлар аз.

— Тоссаргьяц, тIаккха-м хIара денна хьаухарг ма дий из, — хезар сона.

Ма къа да-кх хьа, аьнна, хийтар сона... Дала хьайна доккхача дикага кхача тарлуш бола аьттув белча, из кхетаде иман, низ хиланзар-кх хьа! Тахан цу мискача циска тесса хIама, кхоана доагIаргдолча къематдийнахьа Дала бIаргаяйтаргьяр хьона... Бакъда хьа дего из кхетадац, хьагучох! МIарга Iетта циск цIагIара аракхосса-м доккха хьаькъал эшац!

Из гIулакх хьалъийдеш, дувцаш латташ да вайцига дог лазараша. Дика хургдецарий хIара сага ший коа, шелалах хьулале йиш хургйолаш, цискашта лаьрхIа дахчах зIамига бунаш оттайича? Хьастам Iочутоха ховш волча сага хьадуларгдолаш дика да-кх из!

ЦIагIа эшаш йоаца цхьа тиша хьамаш дIакIалъяьхка, хьадаь цIалгаш Iооттадича, гIорадаь дагIа цискаш, ла ца леш, Iангара довргдар, Даьла къахетамца. Кхы доккхагIа дика хургдий, хьай низаца Дала хьакхелла цхьа дийна хIама кIалхардаккхарал?! Тахан Кхеллачо хIаранена хьабенна аьттув ба из!

Сихлелаш дика гIулакхаш де, тахан оаш хьадаьр, кхоана бIаргагургда шоана яхаций вайга дино?! ХIанад вай селлара къиза, хIана биц вай цу хIамай лерхIам?! БIаьстан денош хьаэттача, лоа дешача, гIорадаь дайна дада цискаш гучадоал. Унзара хIама да из, бусалба нах бахача моттигашка! Котельни е цхьацца тиша цIа доацаш саг вац, ковнаш долаш бахарашта юкъе. Ай, саг къевала, йоккха хало хила хIама да из?! Хьасомадаккха хьай дог, бусалба саг!

Къахетаме бараша-м квартирашка а леладу цискаш. Деррига дIадаьлча, цисках лаьца хьадисаш ма дий вайна! Ше моллагIа дика дича, дега тоам хулаш хила везаций бусалба саг?! Тесса ца а дуташ, теркалде вай из гIулакх! Вай дерригаш оарцагIдаьлча дуккха синош кIалхардоахалургда бирсача шелалах! Уж мо долча хIамаша вай дегашта хало ца йой, сенах хало хургья вайна, аьнна хет...

Бераш тIехьадаьха дIакоа ваьлча, моллагIча маIача сага, йоккха юкъ ялалехь, хьадергдар мискача цискилгашта из цIалг. КIалха цхьа тиша ювргIа билле, малх дикагIа тIалаттача Iооттаде, Даьла раьза хургва вайна тIаккха... Къахетаме хила вай, ва бусалбаш!