Skip to main content

Шоай декхар дизза кхоачашдир

Донецкеи Луганскеи шоай тIема декхараш кхоачашдеш хинна, росгвардейцаш цIакхаьчар

Магасерча гIала духьала уллача доазон тIа гулбир Росгварде доакъашхой, «Беркут-Юг» яхача ОМОНЕ чуболхараш. Донецкеи Луганскеи латтача хатара юкъе, шоай тIема декхараш кхоачашдеш хиннаб уж кагий нах. Донбаса бахархой лорабеш, командираша шоашта хьалхашка оттадаь декхараш кхоачашдеш, лаьттаб хIанзолца росгвардейцаш. Из кхетаче хетаяь яр Россе Ден. Маьрша болаш цIенах кхийтта кагий нах даькъала бувца, царех бIарг тоха гулбеннабар дуккха бахархой. Царна юкъе бар: росгвардейций ноаной, йижарий, гаргара нах. Хозача дешашца царна баркал оалаш, ший къамаьл дIадоладир, вай Мехкдас, Келматанаькъан Махьмуд-Iаьлас.

«Тахан вай массане Россе Ди дездеш да, хIаьта вай кагий нах Россе бокъонаш лораеш Донецкеи Луганскеи латт. Цу моттигашка бахача наьха вахар маьршача даккха гIерташ, цигара хьал тоаде гIерташ къахьег Россе президента Путин Владимира. Тахан, цо иштта хьаоттаяь политика я, из нийса а лоархIаш, хIаьта вай дерригаш а цун оагIув хьаллоацаш да! БIарччача биъ бетта шоашта тIадехка декхараш кхоачашдеш, деналца, мехках дог лазарца лаьттад шо Украине. Халача хьале хиннад шо дерригаш а, цу ерригача хана. Эггара лоархIамегIа дар — шо могаш, маьрша долаш, тахан цIенах кхетар. ХIара денна сатувсаш чIоагIа хьийжаб шуга шун даьй, ноаной.

Къаьстта, тахан, шо цIадахкарга хьийжаб уж, вай дерригаш укхаза цхьана гуллургдолаш. Аьттонца, дикача уйлашца, тоалолда шун вахара наькъаш дIахо йодача хана! Шох хьега безаш ма хилба шун ноаной! Могаш долаш, иразе дахалда шо шоаш кхедаьрашта!», — белгалдир Мехкдас. ДIахо вай Мехкдас хьоахадир, мел халача ханашка, дуккха кхоачамбоацараш, духьаленаш йолаш хьаэттар таханара Российски Федераци. «Вай паччахьалкхе хьакхелла ханаш аттачарех яцар. Шоана массанена дагадоагIа, I990-ча шера, аьтинга бетта 12-ча дийнахьа паччахьалкхе хьакхоллаш мелла духьаленаш, халонаш яр. Тахан оаша шоай деналца хьахьекхар, эздий массал да.

ДIахо йодача хана а, мехка бокъанаш лораеш шоаш дIагIоргхилар гойтар оаша массанена. Вай паччахьалкхен доазув лорадеш ца хилча, цун хьал эшаделча, экономикан, социальни оагIон гIулакхаш а шоллагIча мугIаре отт», — аьлар Мехкдас. «ГIалгIай республика 30-шу» яхача майдилгашца белгалбир шоай декхараш дизза кхоачашдаь, сийдолаш цIакхаьча росгвардейцаш. Цул совгIа, Россе Ди дездеча дийнахьа, 14 шерага кхаьчача, дуккхача, бахархошта паспорташ дIаделар Мехкдас. Ираз, аьттув болаш бахалба вай мехкахой! ЦIаккха а, тIом яхача дешо, вахар толха мадолда вай!