Алхасте тоадеш латтача футбольни доазонга хьажа баха хилар единороссаш. Из моттиг тоаеш латт къаман программага гIолла.
«Алхастерча футболах ловзарашта тоаеш латтача моттига хьал малагIча боарам тIа да хьажа баха хилар, Шолжа кхалерча «ЦаI йола Росси» яхача парте секретарь вола Йовлой Мухьмад, Алхастерча администрацен кулгалхо Фаьрганаькъан Расул, МПС доакъашхо Ганенаькъан Мухьмад, юрта депутаташ Белхарой Керам, Боканаькъан Салман», — йоах тхога кхаьчача хоамо.
Эшаш мел долча хIаманца, хоза тоае лерхI из моттиг. ДикагIйола кIийле йила, гобаьккха лампаш, гIандаш догIа, безам тIагIоргбола доазув де лерхI цох. Хьадувцачох, укх шера гурахьа, кийча хургья футболах ловзарий майда.
