Туризма болх бувцаш дIайихьача конференце къоастадир, хьаьшашта даь цIенош долчарна, уж цаI йолча федеральни реестра юкъе дIачудахьар. Ишттача оагIорахьа дIабихьача балхо туристически бизнеса гIулакх дикка тоадергда, салаIа ухача наха эшараш а лакхача боараме лоаттаде аьттув хургба.
«Хьаьший цIенош да вай юрташка. Республикан кулгалхой цар оагIув хьаллаца, гIо лоаттаде ловш ба. Бакъда из гIулакх чакхдаккха йиш хургьяц, уж дIа ца яздича, фу тайпа да белгалдеш бола болх чакх ца баьккхача», — аьлар интервью луш, туризмах йолча комитета кулгал деча Мизинаькъан Беслана.
Хьаьший цIеношкара, из болх чакхбаккхара тIехьа, дехараш дIачуийде доладаьд. Таханарча дийнахьа, цу гIулакха хьалха латтача вай мехкарча болхлоша масал эц агротуризма хьал тоадара тIехьа Белоруссе дIабихьача балхах.
