Skip to main content

Франце бахача гIалгIаша дагалаьцар вай къам мехках даьккха ди

Вай къам мехках даьккха 78 шу дизара хетадаь вIашагIкхетар дIадихьар Францерча Ницца яхача пхье. «Ниццера гIалгIай культуран кхуврч» яхача моттиго вIашагIделладар из гIулакх. Тха газетага из хоам баьр ва Франко-ГIалгIай кхуврча доакъашхо, Боканаькъан Iиса. Цо дийцар: Франце баха гIалгIай гулбеннабар Казахстане шелалахи, моцалахи вахар хаьда вай къаман нах дагалаца.

Иштта, хьоашалха баьхка хилар нохчий къаман нахи, Ниццерча маьждига имами. Пхьугой Бекхан хьалха волаш, цу гIулакха къахьийгараша кийчъяьяр Казахстане вай наха текха Iазап хьахьокхаши, дувцаши йола видеороликаш.

Гулбеннараш 90 саг вар. Царна юкъе бар боккхий бараш санна, студенташи, ишкола дешархойи. Къамаьл дир цу хьаькъехьа Ниццерча маьждига имам волча Магамадов Басхана, иштта, Оздой Iийсаси, Пхьугой Бекханои. Хийрача, шийлача мехка вахар хаьдарашта тIехьа дуIаш даь, сагIах кхийттар гулбеннараш.