Skip to main content

ГIалгIай паччахьалкхен университете дIайихьача Iилма
конференце боккха пайда ийцар

ГIалгIай паччахьалкхен университета химико-биологически факультете студентий Iилма конференци дIайихьар, цига хилар профессораш - хьехархой, БурокIаларча №1 йолча ишкола дешархой, аспиранташ, магистранташ, факультета студенташ.

Конференце балха кулгалдеш яр химически Iилма кандидат З.И. Инаркиева. ДукхагIча даькъе цун маIан дар, студентий а къонача Iилманхой а кхоллам дикагIа дегIабоалабар, таханарча Iилма декхараш кхоачашде уж Iомабар, Iилма дешара оагIув лораяр, из дикагIа дегIайоалаяр, хургболча Iилма болхлошта юкъе айхха бувзам лелабар.

Гулбеннарашка моаршал хоатташ дош аьлар химико-биологически факультета декана М.К. Дакиевас, химе кафедра профессора А. Х. Саламова. Цул тIехьагIа цу юкъе дакъалоацараша шоай докладаш йийшар, химически шоу, дешархошта фу хов хьожаш дола квест-ловзараш «Брейн-ринг» хилар.

Цу конференце студенташа яьча итта докладах, форум йистейоалаш дикагIа яраш хьакъоастайир, интеллектуальни ловзарашка котбаьннарашта грамоташ а дагалоацама совгIаташ а делар, аьнна хоам бу «Сердало» газетага ГIалгIай паччахьалкхен университета пресс-службо.