Skip to main content

ГӀалгӀайче 40 совгӀа тайпарча ахчай а пособей а боарам лакхлургба

2023 шера саькура бетта 1-ча дийнахьа денз, ГӀалгӀайче 40 совгӀа тайпарча ахчай а пособей а боарам лакхлургба, аьнна, хоам бир «Сердало» газетага моттигерча къахьегама Министерствос.

«11,9% тIакхетаргда вахар хьаллоаттаде тела массехк тайпа ахчаш. Цу юкъе да хьадаьча бера доагӀаш дола цкъара луш дола а, бера хӀара бетта луш дола а, наьна капитал оалаш дола а, ветеранашта хӀара бетта луш дола а ахчаш, страховой а иштта вахача новкъостала луш дола а ахчаш», — йоах хоамо.

Хьалхарча бера луш дола наьна капитал оала ахча лакхлургда, 587 эзар сомага кхаччалца. ТӀакхетар лоархӀаме да, из да 2022 шера хинначул 62,5 эзар сом дукхагIа. ШоллагӀча бера луш дола ахча 775,6 эзар сома нийса да. Соахка хинначул, 82,5 эзар дукхагIа да из а.

ГIулакх довзача наха белгалду, из хӀара российски дезала ахчанцара дика новкъостал хилар, цо таро хулийт цхьаццадола дезале айтта дешаш кхоачашде.