Skip to main content

Георгиевски кавалер хиннача Боголов Мухьмада цIера хетабаь, гойтам дIахьоргба музее

Вай къаман исторе йоккха лар йитача къонгий цIераш йовзийташ, болх дIакхухь мемориальни комплексерча музее. Таханарча дийнахьа, цига дIахьош бола видео-гойтам, Российски императорски арме юнкер хиннача Боголов Мухьмада хетабаь ба.

«ГIаьзе-Коа ваьвар Боголов Мухьмад 1892-ча шера. ТIема декхараш кхоачашдеча гIулакхе из дIатIавахар, 1912-ча шера, Терскерча милице говрбаьри волаш. Дунен хьалхарча тIема юкъе дакъа лаьцарех ва Мухьмад. Дики дивизен бIухошца тIом беш чакхваьлар из.

Денал гойташ, моастагI вохавеш латтарах, йиъ орденца белгалвоаккх из. 1917-ча шера, цу полкаца ший мехка цIакхоач из. ТIом сацачул тIехьагIа, юртбоахама гIулакхе къахьегаш ха йоаккх цо. 1944-ча шера, мехкаца, Казахстане вуг къаман сийдола воI. Гаьнарча, хийрача мехка 1948-ча шера, хад цун вахара денош», — дийцар тха газетага, из гойтам вIашагIбеллараша.