ММА вIашагIъийнача латарах йолча СКФО чемпионате, ГIалгIайчен итт латархочо республиканна коталонаш ера, аьлар «Сердало» газета корреспондентага ГIалгIай Республикан спорта Министерствон болхлоша.
«Нохчий Республике, тушола бетта ялхайттлагIча дийнахьа денз ткъестлагIча денга кхаччалца, дIахьош хиннача яхьашка дакъа лаьцар спортсменаша Кхоартой ИбрахIима, Хоасботанаькъан Аслана, Хамхой Адама, Кхоартой Билана, цар дошо майдилгаш яьхар.
Дото совгIаташ даьхарех вар Магомедов Джамбулат, Овшанаькъан Тамерлан. Борза совгIаташ кхаьчар Малсаганаькъан Мухьмадага, ГIудантанаькъан Мухьмад-Аминага, Дзейтанаькъан Аптега, Иленаькъан Ясирага», — йоах хоамо.
Вай командас яьккхар юкъарча къовсаме хьалхара моттиг. Котбаьннарех итт саг яхьеваргва Ханты-Мансийске дIахьоргйолча Россе чемпионате. Из дIаяхьа лерхI карарча шера маьтсела бетта 31 денгара кIимарса бетта 4-ча денга кхаччалца.
