Skip to main content

Беза хьаьший

ГIалгIайче баьхка хилар, Ивановерча интернацианальни берий цIагIара хьехархой

ГIалгIайче баьхка хилар Е. Д. Стасовой цIерагIча «Интердом» «Халкъашта юкъерча Федеральни ГБОУ дешара центра» болхлой, хьехархой къахьегама ветеранаш. Дунен тIа дика довзаш долча цу интернациональни берий цIагIа, тайп-тайпарча ханашка дешаш а кхедеш а хилар ГIалгIайчера бераш, аьнна хоам бир «Сердало» газетага, дешара урхалене.

«Интердомо» ше болх бе доладеннача хьалхарча деношка денз, дерригача дунен тIарча халача хьале нийсденнача берашта новкъостал даьд. ГIалгIай бераш интернате кхаьчар юххьанцахьа 1995 шера, нохчашкахьа тIом болаш, хIаьта 2002-ча шера доккха хий дена Iобихьача дезала фусамашкара бераш кхаьчар ДжIайрахьа районера. Цу хана денз, дукха дезал болча а, иштта хала бахача а дезала юкъера бераш кхаьчад ГIалгIайчера Иванове«, — аьлар «Международный Дом Дружбы» «Многопрофильни центра» кулгалхочо Г. И. Шевченко.

Республикера цига кхаьчача берашта, дешар, лакха боарам болаш хьийхад, кхоллама а спортивни а говзал Iомаяьй, унахцIено чIоагIъяьй, дика хьалаш буаш бола кхача а лерттIа хиларах.

Берий вахар дика а, яхьашта юкъе даима дакъалоацаш а, цхьаццанахьа болхаш никъ беш а, тайп-тайпара вахара никъ бовзийташ а хиннад.

ДIаяхача юкъа Интердоме 300 гIалгIай бер хиннад. Таханрча хана, профессиональни дешар дийша а баьнна региона а, кхыча республикашка а къахьегаш хьабоагIа уж. Кагийбарий цхьа дакъа юкъерча, лакхерча дешара кхуврчашка дагIа. ГIалгIай хьехархошта лаьрхIа дешара семинараш дIайихьар.

Интердомо вIашагIъехкача мероприятешка региона викалаша дика дакъалаьцар.

ГIалгIай Кулгалхоша Интердоме да-нана доацача берашта, тайп-тайпара совгIаташца новкъостал дир, иштта «Эрзи» ахкана лагере а хила таро вIаштIехьяьккхар.

ГIалгIай Республика юхаметтаоттаяь 30-шу дузаш Интедома хьехархоша, хьехамчаша республика бахархой а кулгалхой а даькъала бийцар цу цIайца.

Дукхача шерашка къахьегарах Интердома ийс хьехархочунна «ГIалгIай Республика цIихеза хьехархо» яха цIи енний, хIаьта интерната кулгалхочунна «За заслуги» яха орден енний.

Карарча хана, Интердома хьехархой а ветеранаш а лаьрхIа ба «Наши общие страницы истории» яха акци а, иштта «Дом детских надежд» яхача Иванове интернате дагIача берий вахар дувцаш долча книжка презентаци е а, цунца цхьана кхы а мероприятеш дIаяхьа а.