Skip to main content

Къахьегамага хьежжа ба лерхIам

ГIалгIайче Iаьдало гIо ду, ший доалахьарча боахаме къахьегарашта

Глава Ингушетии Махмуд-Али Калиматов вручает сертификат на один миллион рублей победительнице республиканского конкурса на лучшее подсобное хозяйство Рапиат Пидиевой, жительнице села Даттых

«Ший доалахьара дикагIа бола боахам» яхача республикански конкурсе котъяьннача, ДаьттагIе яхача Пхьединаькъан РапиIата, цхьа миллион сомах латта, сертификат делар Мехкдас Келматанаькъан Махьмуд-Iаьлас.

Укх шера, наджгамхой бетта, цхьоалагIча дийнахьа денза чIоагIбенна дIаэттар Россе Правительстве юртбоахама хьал тоадеш, цу наькъа тIа къахьегарашта гIо деш, цар продукци йоаржаеш баь соцам. Цу каьхата кулг яздир, премьер- министр волча Мишустин Михаила, 2021 шера, чантар бетта 24 дийнахьа. РФ Правительстве баьча соцамах, госпрограмме цхьацца хувцамаш хиннад юртбоахама оагIув хьаллоацаш. Цу наькъа тIарча къахьегамхошта Iаьдало, гIо де лаьрхIад шоай продукци йоаржаеи, цох боккхагIа бола пайда эцеи. ХIанзчул тIехьагIа цар аьттув ба Iаьдалгара субсиди эца. «Баьча соцамо дикка гIо дергда шоай боахаме къахьегарашта.

Аьттув хургба шура, дулх, баьцадаараш тикашка доаржаде. Из мехка пайда беш гIулакх хургда», аьнна дийцар Правительстве. Шоай коа тIарча юртбоахаме коартол, шура, доахан, жа, гаьзарий — леладерашта, ахчанца аттагIа хургда.

Шоай царех дIадахьа нийсса ах ахча, юхаметтаоттаде таро хургья цар. Ма дарра цох хиннар тIайоагIача хано хьахьокхаргда. ХIаьта, таханарча дийнахьа, цу мугIарерча къахьегамхошта гIо дар, вай мехка лоархIаме латтача гIулакхех да. «ДикагIа бола юртбоахам» аьнна конкурс кхайкаяьяр дIахача аьхки вай Мехкдас." Вай республике дукхагIдола даар арахьара хьачукхухьаш хилар гIадвугаш дац! Йоархаш тIаяьнна, доал деш доацаш дукха лаьтташ дада наьха. Кхувш йоагIа тIехье къахьега Iомае еза вай. Шоай миско фермашка, коа тIарча бешамашка къахьегаш, цох боккха пайда хулараш а ба вайна юкъе. Ший кулгашца, хьаьнала болх беш воалчун де деза гIо! Уж ба тахан теркалбе безараш Iаьдало. Цар оагIув хьаллоацаргбар дергда аз тахан", — аьнна къамаьл дир Мехкдас.

Вай мехка хьалхара хиннача цу конкурсо хьахьекхар, дуккхача наьха къахьегам. Дакъалаца йиш йолаш вар хIара вар. КIезига бацар шоай низаца, хьаьнала хIама деш хиннараш.

Цхьацца йола меттигаш цецъвоалаш а яр. Къахьега безам хиларо лакхача лагIа тIа воакх саг. Правительственни комиссе, конкурсе, 13 саг къоаставир. Хьалхара кхо меттиг яьккхарашта делар цхьа миллиони, ах миллиони, 300 эзари сом ахча. Юхебисараша ийцар 50 эзар сом ахча, хIаране. ХIаьта, котало яьккхар хилар, ДаьттагIара Пхьединаькъан РапиIат. Цу конкурсо кхы а дукхагIа низ чуболлийтар, къахьега ловрий дегашка.

Хьаьнала хIама ший коа хьаде гIертар, кIалвусаргвац! Кхычара ахчах тикашкара ийдер, ший коара хьачукхухь боккъонца волча къахьегамхочо.