Яндарерча культуран ЦIен исбахьален кулгалхочо Йовлой Мадинас дешархошца къамаьл дир «ЦхьоагIонца-низ» яхача кепара. Цо дийцар бIаьшерашкахьа, Россех ГIалгIайче дIакхийттачул тIехьагIа, хиннача хувцамех. Керттера цига белгалдаьр дар, боккхача мехка дахаш дола къамаш цаIаш хилар, цар низ къахьегамца чIоагIбеш хилар.
«ГIалгIайче хьалхарчарца Российски имперена юкъеера. 1770 шера бIаьсти, Онгашта бахархой вIашагIкхетар хилар Россе викалашца. Цига цIихезача, наха лоархIаш долча ялх тайпан викалаша Россена мутIахьа хилара чIоагIо йир, дув баарца.
ВIашагIкхетар дIадихьар къаьнарча гIалгIай Iадатех доаггIача беса. Кулгаш яздир гулбеннарех 24 сага. Цига вена хилар 800 саг.
Цу тайпара Россе паччахьалкхенах вай дIакхетар, гIалгIаша Россе Iаьдал тIаэцар чIоагIдеш, кулг яздир», — аьлар Йовлой Мадинас ший зIамигача ладувгIархошка.
