Skip to main content

ГIалгIайчен чкъаьрий лувцарашта лаьрхIа турнир дIахьоргъя МагIалбике

Чкъаьрий лувцар дегIадоагIаш латт

Шахьара кулгалхочун Кубка йола чкъаьрий лувцархошта лаьрхIа республикански чемпионат дIаяхьа кийчлуш ба МагIалбике. Из дIахьоргъя СоагIапчарча Iам тIа 19 июне, моттигерча чкъаьрий лувцараша новкъостал а деш.

Из турнир дIаяхьара мел дола хаттараш МагIалбика мэр волча Галай Мувсайца вIашагIкхетар долаш дийцар, чкъаьрий лувцарий клуба викалашца, шоашта кертте Даурбиканаькъан Адам а волаш.

Шахьара администраце шийна хьатIаийцар, палаткашца, гIандашца, истолашца, цхьа бIаь сага лаьрхIача буача кхачанца Iалашо ергъя аьнна. ХIаьта шоай аргIах чкъаьрий лувцарий клубо тIехьара моттиг цIенъергъя, доакъашхой дIа-юха нийсбеш тIаэцаргба.

Турнир дIаяхьара маIан да дика хIама хьалха даккхар, кхетамбалар, аьлар «Сердало» газетага МагIалбика администраце. Iаламца мишта хила веза, шахьарера мах бараш мишта лораде деза, салоIама ха мишта дIаяхьа еза яха хаттараш чудоагIа цига, цох пайда эцаргба вай къона тIехье Iалам лорадара тIахьеха, керттера декхар лоархI турнир вIашагIъеллараш.