Skip to main content

ГIалгIайчен кагийбараша котало яьккхар нальчикерча «Спартакагара»

ТIема сийлен цIерагIча МагIалбик — шахьарерча, футболах йолча, «Ангушт» яхача Республика спортивни школа команда котало яьккхар, шоай нийсархошкара, нальчикерча «Спартакагара», цар кхетаче хилар кагийбарий футбола лиге-Юг, ялхлагIа тур дIахьош. Цунах хоам бир, МагIалбик — шахьара администраце пресс-служба.

«Кхетаче хилар Нальчике, «Спартак» стадионе, йистеяьлар 2:1 чот йолаш вайбараша котало а йоаккхаш. Цу матча еррига голаш чуяьхар, хьалхара ловзара дакъа дIахьош. 32 минота ха дIайодача хана, хьаьшаша шозза коанаIарашка гол чуяьккхар. ВорхIлагIа минот дIахьоча хана, БIархой Бекхана ший команда хьалхаяьккхар, сеткагIа бургац чуяьккха. Ткъаь шийттлагIа минот йодаш, гIалгIай кагийбараша пенальти яьккхар, из маьхалъяьккхар вар, Гойганаькъан Хаваж.

ШоллагIа ловзара дакъа дIахьош, Оздой Хьасана котало дIачIоагIъйир. Бакъда, ловзар йистедоалаш, магIалбикерча кагийбараша, 77 минот йодаш, Гойгов Хаважа цIе карточка хьаийцар», — аьлар «Сердало» газетага, МагIалбика администраце, пресс-служба.