Skip to main content

ГIалгIайчен кердача микрорайонашка ишколаш хьалъеш латт

Дешара кхуврчаш шерлуш латт Элдарха — гIалий тIа. Укхаза кердача микрорайоне 720 моттига лаьрхIа ишкола хьалъе йолаяьй. Кхозза вIашакаряьча гIишлон чу хургъя актови, спортивни, дешара залаш, столови, даар кийчду моттиг, дешара кабинеташ, лаборатореш, кулгалхошта лаьрхIа моттигаш, аьнна хоам бир «Сердало» газетага шахьара мэре.

Йоккхача дешара гIишлон чу берий таро хургъя 29 классашка деша, царех 8 — юххьанцара классаш я, 4 класс — кхыча паччахьалкхен мотт Iомабара лаьрхIа я.

2022 шера декабрь бетта бераш цу хозача ишколе дешаш хилийта лерхI. Из «Дешара» Къаман проект маьхалъяккхара йола программа я. Хоам бу цу гIишлон заказчик — гIишлон, архитектура, вахара — коммунальни боахама министерстваеи, «ТЦ Балторг» ООО подрядни организаци я аьнна.