Skip to main content

ГIалгIайчен Шолже дIаболабеннаб, Моздокски урамах, никъ тоабара шоллагIча даькъе болх бе

Шолжа-пхье эггара йIаьхагIа йола урам я Моздокская, из чакхйоалаш я, Рабочая оалача урамах центральни транспорт лелача наькъа духьала.

Цхьабакъда, новкъара валара бола никъ санна из хиннабале а, цу тIа хьалхагIа, нах кIезига лийннаб. Из дар, никъ лерттIа тоабаь ца хилар бахьан долаш. ЖагIа уллаш хиннача моттиге а, массехк зулам далара кхерам болаш бар из. Шолжа мэре йоах, 2021 шера моттигерча бахархоша хьалхарча аргIах тоае еза урамаш белгалъяра аьнна, кхадж тессача хана, белгалъяьяр из геттара сиха тоае езарех я аьнна. Уж балхаш дIахьош да, «Формирование комфортной городской среды» яхача, федеральни проектах.

Моздокски урамах асфальт Iобилла болабелар дIадахача шера.

700 метр бIоахал бола никъ асфальтобетонаца чIоагIбир. ХIанз юхебисса 800 метр йола асфальт, Iобиллача из болх йистебоал.

Бакъда, наькъа такилг Iодиллара болх, проект оттаеча хана дIалаьрхIадац.

Укхаза иштта, ца хилча даргдоацарех да, Шолже асфальт Iобиллалехьа е моллагIча кхыча шахьаре из буллаш бале а, моттигерча хина турбай хьал лерттIа хилар, лоархIаме да наькъа кIалара коммуникаце хьалаш меттадоаладар.

Цудухьа, укхаза хина турбаш я хувца езараш, из болх а керда боаккхаргба. Эшаш йола материалаш ийцай, тоаеш латтача объекта юхе я уж.

Тоаеш йолча урамий йIоахалла йолаш я, кIалагIолла йолха турбаш а.