Skip to main content

ГIалгIайчера «Онгушт» яхача берий ансамбло, халкъа халхара, Халкъашта юкъерча конкурса Гран-при яьккхар

Краснодаре дIахьош хиннача, «Душа народа» яхача, халкъа халхара, Халкъашта юкъерча конкурсе, ГIалгIайчен МагIалбика района Дебе-Юртарча культура ЦIен «Онгушт» берий хореографе халхара ансамбла, хьалхара моттиг яьккхар.

НачIал долча хореографа Котанаькъан СаIада воспитанникаша конкурса Гран-при яьккхар, уж конкурса шин даькъах дикагIчарех хилар-халкъа халхар, халкъа сценически халхар.

«Вай берригача мехкара тайп-тайпарча регионашкара 150 коллективаш яр цига, халкъа халхараш гойта ена, Кавказа халхараш, халкъа сценически халхараш, акробатика, пандарцара гойтамаш.

«Онгушт» хореографе ансамбла постановка эггара чIоагIагIа безам тIабодаш а дог айдеш а яр. «Душа-народа» фестивала-конкурса жюре боаггIача бесса мах оттабир вай коллектива.

Исбахьлен ансамбла кулгалхочунна Котанаькъан СаIада «Лучший балетмейстер» яха, лаьрххIа йола приз ялар, гIалгIай сценически халхар эггара хозагIа хилар белгал а даьккха. Иштта баркал оалаш дола каьхаташ делар балетмейстерашта Бохтаранаькъан Д. Р., Бохтаранаькъан З. Б.», — аьлар «Сердало» газетага, МагIалбика района администраце пресс-служба.