Skip to main content

ГIалгIайчера йиIиго цецбаьхар «Звездная феерия» доакъашхой

Эбарг-Юртарча культура ЦIен къона дешархо Хашинаькъан Дали хилар «Звездная феерия» пхелагIча Халкъашта юкъерча конкурс-фестивала лауреат. «Эстрадный вокал» яхача номинаце дакъалоацаш 7-9 шу даьннарашта юкъе Дале жюре доакъашхошта гойтар вокалах шийна карагIдоалар.

«Из конкурс вIашагIъеллар я «Мир искусства» берий кагийбарий кхоллама Фестивальни программа. Фестивала керттера оттадеш дола декхар да, къонача а кагийча начIал долча наьха кхоллам а иштта къаман культура а йоаржаяр, искусства новкъосталца мехка масса йолча миIингашкара начIал дола бераш а, кагийбараш а, боккхийбараш а вIашагIтохаш йола кIийле яр.

Из дика масала да цар шоайла кхоллама наькъ тIа балха говзал дIа-юха эцара», — аьлар «Сердало» газетага Эбарг-Юртарча культура ЦIен кулгалхочо Мерешканаькъан Соняс.

«Мир искусства» фестиваль вIашагIъеллараша лакха мах оттабир искусства дегIайоалаяра хьакъехьа, профессиональни говзал, хьехархочунна начIал лакха хиларах ГIалгIайчен зIамигача артиста Пхьиленаькъан Фатимайна.