Skip to main content

ГИБДД болх чIоагIбеш

ГIалгIайчен почта отделенешка гIолла, 2021 шера, ГИБДД теха гIод цхьа эзареи кховзткъанега кхоачаш дIатакхар.

Говзанчаша белгалду, Россе Почте гIолла гIод дIатокхаш дуккха а аттагIа хилар, цу гIулакха каьхаташ а кIезига мара эшаш хилац.

Таханарча денна, вай бахархошка ГИБДД болхлошкара хьакхоача гIод теха хиларах хоам беш дола каьхаташ, электронни оалача хьисапе да, из бIаргаго таро я личный оалача кабинете Iочуваьлча. Из я zakaznoe.pochta.ru е gosuslugi.ru. Цо таро хулийт, машенашца лелача наха шоай ханнахьа, теха гIод дIатакха 50% маьха чухьнахьа а долаш.

ГIалгIай Республика УФПС кулгалхочун гIонча волча Сукенаькъан Къамбулата хьалхадаьккхар, личный кабинете Iочуваьлча электронни каьхат «хьаийцад аьннарех» долга, из почте гIолла кулг а яздаь хьаийцачунна нийсса да.

Беррига хоам бувзамга гIолла дIа-юха кхоач, цудухьа лоархIамерча гIулакхах бола хоам а, нахага, дIакхоач ший ханнахьа.

Иштта белгалдоаккх, элетронни оалача хьисапе из каьхат дIадахьийта таро йоацачарна, почте гIолла из дIакхоачийташ хилар. Цу тайпара бола хоам, республике гIолла, цхьан бетта 40 эзар хул.