Skip to main content

ГIурбаш деча деношка Элдарха — ГIалий тIа дахача берашта лаьрхIа цIай дир

Элдарха — ГIалий тIа цIай дIадихьар ИД аль-Адха долча деношка дин дикагIа довзий хара берий конкурс вIашагIйолларца. ШоллагIа шу да, цу тайпара мероприяти укхаза тIема ветераний Сквере дIахьу. Из хетаяьяр вай, бусалба наьха, эггара дезагIа долча деношта.

Шахьара джума- маьждига имама Султыганаькъан Мухьмада хьалхадаьккха, моттигерча бусалбай юкъарлено ахчанца новкъосталдеш, цу юкъе моттигерча администраце кулгалхоша гIо а деш вIашагIделла дар из.

ЦIай дездир — конкурса «Хьай дин довза».

Берашта юкъе кхаь даькъа йийкъа яр яхьаш: Мухьаммад Пайхамара (С. А. В.) вахар довзар, акидаш (динах тешар чIоагIдар), медресе аха болалучарна юкъе КъорIан тIара сура дагахьа ховш хилар.

Цу юкъе дакъалоацаш дар Элдарха — ГIалий тIара а, иштта ГIалгIайчен кхыча юрташкара а 12 шу даланза дола −100 бер.

Котбаьннарашта яла оттаяьяр планшеташ, пхи эзар сом ахча, мобильни телефонаш. КхоалагIа моттиг яьккхарашта пхи эзар сом ахча делар.

Иштта котбаьннарашта, даьхача толамашка хьажжа, грамоташ ялар.

Цул совгIа мероприяти дIахьош цу Сквере мел нийсвенначунна а мерзача хIамаех даь совгIаташ делар.