Skip to main content

Россе сийдола гIишлонхо вар из

Iарчакхнаькъан ИбрахIима Ахьмада 80 шу дизад

(аьттехьара аьрдехьа) Наьсарерча ПМК-432 кулгалхо Iарчакхнаькъан Ахьмад, цун заместитель Овшнаькъан Къамбулат

Укх шера 80 шу дуз вай республике цIихеза долча цIагIара хьаваьннача Iарчакхнаькъан Ахьмада. Цун да ерригача республике вовзаш а лоархIаш а Iаламсаг вар, «Iарчакхнаькъан ИбрахIим-молла» аьле, сий деш йоаккхар цун цIи, из вовзача а цавовзача а наха. Из воккха саг цкъа-шозза яхар санна бIаргаго аьттув баьннабар са. Школе дешаш волаш, тхоай цIагIа вайнавар сона из, шийца тха даь-да вига вена. Цхьан гIулакха юкъе тоам бе болхаш бар уж. Студент волаш, Шолжа-ГIалий тIа трамвай чу вайра сона из цIаькха. Бакъда цун воI Ахьмад, вувцаш хезавале а, сона вайнавцар, цунца цIаккха къамаьл хинна вацар со. Дуккхача моттигашка къахьийга а арахьа лийнна а саг вар гIишлонхо.

Ахьмад ваь хиннав 1941 шера Нохч-ГIалгIай АССР Пригородни района Керда ЖIайрахь яхача юрта. Цун нана Иленаькъан Калимат яхаш хиннай. Сибрера цIабийрзача, цар дезал баха сайцаб Наьсар-Керте. Цу хана денз, шоаш Iеш бола моттиг ца хувцаш, чакхбаьннаб цу дезалера боккхагIбараш. Цу юртара школа яьккхачул тIехьагIа, зIамига саг деша отт В. И. Ленина цIерагIча Дагестански университета гIишлонхой факультете, из дика дешарца белагала волаш чакх а йоаккх цо. Ший хьамсарча районе болх беш дикка ха йоаккх къонача болхлочо. Из хиннав ПМК −432 мастер, прораб, кулгалхо, Иштта балхаш даьд цо Нохч-ГIалгIай гIишлошъяра урхаллен чуйоагIача ПМК-105. 1979 шера ИбрахIима Ахьмад кулгалхо а волаш, вай республикера гIишлонхой БАМ хьалъеча къахьега болх. Цар яьча гIишлонхоех я Кунерма яха бIарчча юрт, Лена-Кунерма яха цIермашена никъ. Цигара цIавеча Шолжа-ГIалий тIарча СпецСМУ-10 цхьан юкъа цо кулгалдеш хиннай. Цул тIехьагIа Шолжа-ГIалий тIарча аьшка-бетона конструкцеш хьаеча завода директор хилар цох. Из цига волча хана, со Нохч-ГIалгIай книжни издательстве балха вар. Цхьан дийнахьа со волча чувера нохчий говзамеча литературан редактор, къаьна йоазонхо, журналист Саракаев Хьамзат.

-Сали, — аьлар цо, — завода директор вола Iарчакхнаькъан Ахьмад вовзий хьона?

-Вувцаш хезав сона, бакъда цIаккха сона вайна а, са къамаьл хинна а саг вац из. ХIана яхар Iа?- хаьттар аз.

-Гараж еш воалл со. Заводо бахача нахага армтура а бетон а йохка тигац. ЧIоагIа къе я уж вайцига. Директорга аьлча фу хул хьажа воаллар со, — аьлар Хьамзата.

-Вовза-м вовзац сона, хIаьта а, хьа безам бале, аз арг-м да хьона, — аьлар аз, воккхача сага юхь яр духьа.

-Воллел хIаьта, хьалдаха доагIаргдар вай, цох фу хул хьежа, — аьлар Саракаевс.

Тхо балха дола издательство цу хана Ленински районерча «Нохчий гастроном» оалача тиканна лакхе, шоллагIча гIата тIа, яр. Завод гIалан заводской районе яр. Хьамзата машенаца, хаьхкка, хьалдахар тхо. Директора кабинете со чуваьлча, цхьа ший тайпара кIай корта а болаш (къаваларах кIайбенна бацар из), юкъера ха хургйолаш саг вагIар кабинете. Чуваьнна, се дIавовзийта, айса дена гIулакх дIадийцар аз.

-Дукха езий? — хаьттар Ахьмада.

-Гаража кIал лард йоллал еза мотт сона, — аьлар аз.

-ЭгIахьа бухгалтерга шоашта мел еза дIа а аьле, цунах боагIа мах дIа а беле, дIахьоргья оаш? — аьлар директора.

Сона бокъонца бакъ хетацар сай лергашта хозар. ЧИУСа чуйоагIача гIишлой организацешта денна амар ма дарий, бетони арматуреи коара ара ма йоаккхийла аьнна. Садар-м сел гIадвахар а дацар, Хьамзата гIадвахарга хьежача. Издательстве хаьлкхаччалца, сона баркал яхаш вера из.

-Баркал-м Ахьмада ала деза, аз цига даь хIама дац, тайпан-воша вовзар мара, — бегаш бир аз. Цу заводера аравалале, цхьаькха цхьа саг яйра сона. Студент волаш, Хамхой Ахьмадаца Шолжа района парте райкоме ваха волаш, яйзаяр сона из кхалсаг. Из яр ювцача парте райкома кхоалагIа секретарь хинна Чуранаькъан Султана Фатима. ТIехьагIа гуча ма даллара, из болх беш хиннаяр Ахьмада кулгалдеча завода профкома председатель йолаш. Иштта цаховш нийсделар сона гIорваьнна гIишлонхо вовзар. Ший балха гIандах къастар кхераш, зовза, кIезига, эсала саг из воацилга хайра сона цу цхьан вIашагIкхетарах а. ЦIаькха кодаме венача вайра сона гIишлонхо, кхы а цхьа ткъаьх шу даьнначул тIехьагIа. Цавовззал чIоагIа хувцавеннавар из, хетаргахьа, могаш воацаш вар цу хана. Лоацца хиннача цу шин вIашагIкхетарал совгIа, цунца гIулакх доагIаш хиннавац со цIаккха. Бакъда вовза хьашт долаш а, дика къонах вар из. Цох цкъа санна дуккхаза дувцаш хезадар сона журналиста Майсигнаькъан Саламхана, уж цхьана курорте ухаш а хьоашал долаш а бар. Цул совгIа, юртахой а бар уж.

ГIалгIай республика хьаяьчул тIехьагIа, Ахьмад «Ингушстрой» яхача урхаллен керттера инженер хиннав. Москверча акционерий «Спецпромжилстрой» яхача цхьанкхетара кулгалхочун заместитель, ГIишлошъяра нохчий урхаллен кулгалхочун заместитель хиннав. ТIеххьара цо болх баь моттиг я Сипсой-ГIалий тIара ший доалахьа йола гIишлонхой цхьанкхетар. Ахьмад кхелхав 2010 шера февраль бетта 15-ча дийнахьа.

Цун дезал Наьсар-Керте ИбрахIим-молла ваьхача коа бах. Цун фусам-нана Аьсет я Наьсаре цIихезача наьха саг. Вай Сибрера цIадаьхкача хана денз, наьсархошта къаьстта дика йовза а уж тIауха а моттиг яр, Коккурхой Жамалда парикмахер, ГIаппархой Обкури Сулеймеи кийнаш-фурашкаш еш бола пхьараш, иштта фотоателье чухинна цIа. МугIарагIа Iойоахкар уж цхьан цIагIа. Кийнаш еш хиннача вежарех цхьанне (Обкура) йоI я Аьсет. Наьсаре цу шерашка воккха а зIамига а кийнаш, фурашкаш лелаеш бар. МоллагIа Iа хьае аьннар хьае а ховш, говза пхьараш бар уж. Аз айса хийла цар яь фуражка туллаяьй. Эггара тIехьа айса царга тегийтар а дагайоагIа сона, университета студент волаш, баьццара бос болаш фурашка хьаяйтар аз царга. Вешта аьлча, кулг говза долаш, кхоллама нах бар уж. Цигара хьадоагIаш дар аьнна хет сона, Аьсет хоза язде, сурт дилла ховш хилар. Модельерий школа яьккхача, цо болх бу Шолжа-ГIалий тIарча модан ЦIагIа, «Космос» яхача кинотеатра художник-оформитель йолаш. Ши йоI-воI да Ахьмадеи Аьсетеи. Лейлас чакхъяьккхай Москвера 1-гIа лорий академи, Мухьмад Москвера финансови академи яьккха ва. Из Турце вах, дукхагIа бизнес лелаю цо. Эггара зIамагIа я Фатима, цо ГIалгIай паччахьалкхен университета экономически факультет яьккхай. Обкура Аьсета дийцача хIамаех со гIадвугаш а цецвоаккхаш а хиннар дар, Фатимай ворхI кIаьнк хилар. Нанна-м атта хургдац царга массанега хьажа, уж лелабе, хIаьта а доккха беркат да из. Сона хеташ, Дала шийна дукха везача сага мара лургьяц цу тайпара тIехье.