Skip to main content

Бийкар тIеххьара гургал

Ийс шера деша школа яьккхар 34 сага

Вай республикан кхыйолча школашка санна, тIеххьара гургал бийкар Сурхо тIарча ийс шера дешача школе а. Укх шера из яьккха ваьлар шин классе вагIаш хинна 34 кIаьнки йиIиги. Уж накъабаха а царна ловцаш даха а гулбеннабар берий дай-ноаной, хьехархой, зIамагIйолча классашка дешаш дола бераш. Гулбеннарашта хьалхашка къамаьл дир школан директора Л. М. Хидриевас, классай кулгалхоша М. Аушевас, Р. Дударовас, кхетама балхах йолча директора гIончас П. Нальгиевас, кхычар. Зизаш а совгIаташ а делар шоай боккхагIболча новкъосташта дIахо деша школе бусараша.

Дийша баьннарашта юкъе ба, дика дешарца белгала а болаш, ийс шера алхха дика гойтамаш а долаш, чакхбаьннараш. Масала, царех я Аушева Айзан, Точиева Дали, Булгучева Iайна, Аушева Мадина, Измайлова Индира, Аушева Милана, Булгучев Мухарбик, Измайлов Мухьмад, Точиева Зубейдат, кхыбараш. Царех цхьабараша дIахо а дешаргда юртарча тайп-тайпарча школашка, цхьайтта класс яьккха баллалца. Цхьачар шоай никъ бувзабергба колледжашца а училищешца а.

Шоай школа дIа а яьккха, кердаяр еш латтарах, кхыча (№ 1 йола ГБОУ СОШ) школан тхов кIалха шоаш бале а, безаме а дуккхача хана дицлургдоацаш а дIадихьар дешархоша тIеххьара гургал бийка ди.