ХIанзалца, сона ховш, ялх колледж яр вай мехка. Царех кхоъ Наьсарен районе, шиъ Шолжа районеи цаI МагIалбика районеи яр. Уж чIоагIа накъайоалар эггара хьалха кхувш боагIача. цхьацца балха говзал Iомае гIерташ болча кагийча нахаи мехкараштеи. Цига кийчбора бухгалтераш, медйижарий, милице болхлой, гIишлонхой, юристаш, хьехархой хила безам бола къона болхлой.
ШозлагIа-дале, Iаьдала а дикка гIо дора цар, эшаш бола къахьегамхой кийчбеш, уж балха дIанийсбеш. Укх шера сентябрь бетта денз, ший наIараш хьаелларгья Наьсаре хьаяьча кердача колледжо. Цун директора Шоанахой Тухана ИбрахIима яхачох, из я Къилбаседа Кавказа бе-беча къахьегама доакъошта эшаш бола болхлой кийчбергбола колледж. ГIалгIай республикан министерствон лицензех хьаяь, дешара керда фусам я из. Из хьае дагадехар Тухана ИбрахIим ше ва. Шийна дага мел доагIача хана, бокъонаш лораеча органашка къахьегаш хиннав из, 1979-ча шерагара дIаволавенна, 2020-ча шерга кхаччалца. Вешта аьлча, 31 шера МВД мугIарашка волаш хьавенав вай мехкахо. Министра заместитель, следственни урхаллен кулгалхо а хиннав.
ТIеххьарча 20 шера полковника сийдола цIи лелаеш а ва. 2007 шера денз, юридически Iилмай кандидат ва колледжа кулгалхо. Хьехархочун болх а баьб цо цул тIехьагIа 7-8 шера, экономикаи бокъони институте, университете. Иштта болх баьб парламента аппарата кулгалхочун заместитель волаш. ИбрахIим воккха вац, цун хIанз 65 шу мара даьннадац. Ше могаш волча хана, болх булуча хана, кагирхошта вахаре шоай моттиг хьалаца гIо де лаьрхIад цо. Тайп-тайпарча къахьегама доакъошта хетаяь колледж цох алар бахьан да, цунна чуйоагIаш массехк отделени хилар: стоматологи, фармацея, медйижарий, юриспруденци, бухучёт, деша дахалехь берашта хьехар, юххьанцарча классашка хьехар.
ХIанз а дешархой хьаийбеш бола болх чакхбаьннабац цига. Колледжа филиал хургья МагIалбике. Наьсаре 300 саги МагIалбике 160 саги деша хьаэца лерхI цар. Хьехархой 20 саг хургва. уж яхь дIакхайкаяь, дикагIвар къоаставеш, хьаэцаш ба. Царех цхьабараш хIанз а хьехархой болх беш ба кхыча моттигашка. Уж дукхагIча даькъе школашка, университете, медколледже, кхыча колледжашка къахьегаш ба. Царна юкъе йоазанхой а ба, масала, ТIой-Юртара Дударанаькъан Макка. Из эрсий мотти литературеи хьехаш хургья. Иштта йоккха поалхам йолаш, дуккхача хана Наьсарерча № 1 йолча юкъерча школан директор а хинна, саг я завуча болх бергбола Пхьиленаькъан Хьасана Лида. Лакха говзал йола хьехархой ба МагIалбикерча филиале болх бергбараш а.
Шо-шоай отделенега хьежжа хургья кагирхоша дешаш йоаккха ха. Ийс класс яьккхача а цхьайтта яьккхача а отта йиш цига деша. Ийс класс яьккхарий 3 шераи 9 беттаи деша деза, цхьайтта класс яьккхараш дешаш хургба 2 шераи 10 беттаи. Коммерчески кIийле йолаш да цигара дешар, вешта аьлча, мах тела безаш. Масала, медйижарий дешар дешачар шера 55 эзар сом дала деза. Кхы а ши отделени я из мах тела безаш. Кхыча лостамех деша оттараша 45 эзар сом тела деза. Бакъда дешархо бо дале, цунна дикка гIойле хургйолча тайпара оттабу мах. ХIаране вахара хьалашка, таронашка хьежжа леладу укхаза из гIулакх.
Балха говзалаш Iомае ловш, каьхаташ хьачуденнарашта юкъе ба гIалий тIа, юрта баха кхувшбоагIараш. Царна юкъе ба Сурхо тIара, ТIой-Юртара, Iаьлий-Юртара, Пхьилекъонгий-Юртара, кхычахьара. Цу тайпарча дешарашта тIакхувраш, хьалха дукхагIа йиIигаш хулар. ХIанз уж а вожаш а цхьатарра ба, ала мегаргда. Цхьа хIама да колледжа аьттув хулийташ. Наьсарера кхозза вIаштIардаь цун цIа Тухана ИбрахIима ший доалахьа да, цудухьа цох ахча тела дезаш бац уж. Цхьаькха цхьа лоархIаме моттиг а я, атта тIава аьттув болаш моттиг я колледж хьайийллар.
Наьсарерча пенсионни фонда духхьал доаллача цIагIа я из, цига автобусашца, «газелашца» тIаваха йиш я. Вай къаман беркат хьадаргдола, хьаьнала къахьегамхой кхувлба цун тхов кIалха.
