Skip to main content

Кагирхой даькъалабийцар Мехкадас

Ерригача Россен студентий денца вай кагирхой даькъалабийцар Мехкадас Келаматанаькъан Махьмуд-Iаьлас.

Къаманна накъадоалаш, шоашта хьалхашка беркате декхараш увттадеш, шоай мехка пайда беш, дIадаха аьттув хилба шун, аьнна, белгалдир республикан кулгалхочо.

«Хьамсара гIалгIай мехкара студенташ!
Хьаькъал, лакха начIал, говзал йола кагирхой вай болга ховш, оаш къаман вахаре доккха дикаш дергхиларах дог тийша да тхо! Тахан, федеральни оагIоно мах баь варгвоаца новкъостал деш хиларца, кагирхошта шоаш лерхIараш кхоачашде аьттув хургбараш юкъедоаладеш, къахьег вай. Студент волаш яьккха ха цIаккха а йицлургйоаца, беркате, хоза, боккхача наькъ тIа ваьнна ха я. Цу хана лакхбу сага ший кхетам, Iомалу къахьега, дIахойодача хана накъабаргбола новкъостий хорж.

ХIара дас, нанас сатувс, дийша ваьлча шоай дезалхо лакха говзал йолаш, бехктокхаме къахьегаш, мехка накъавоалаш хиларга. Тахан шун вахаре эггара лоархIамегIдар из да шоана! Из дицде йиш яц оаш цIаккха а! Шоаех дог тийша болча шоаш кхедаьрий, новкъостий, гаргарча наьха дегаш деладеш, къахьегамхой хила деза шух.

Тахан, шоашта хьалхашка дерригача къаман беркате хургдола декхараш увттадеш, дIадаха деза шо! Ше караийцача балха говзанча хила гIерта веза хIаравар. Вай къаман таханарча вахара кхоана эшаргбараш иштта бола болхлой ба. Къонал лораеш, цох пайда эцаш, дIачакхдала аьттув хилба шун! ХIара ди, сахьат, минот шоай кхетам лакхбергболча гIулакха йоае еза оаш.

Кхоана, къахьега доладелча, из накъадаргда шоана а берригача мехка а! Ираз хилда шун массане! Еррига экзаменаш, зачеташ дика дIаяла аьттув хилба шун! ХIара ди, беркате гIулакхаш доаржадеш, дIахьолда оаш», — аьлар Мехкадас Келаматанаькъан Махьмуд -Iаьлас ший къамаьла юкъе.