Skip to main content

Юхахьажал селханарча вахарга....

Къахьегамо мара кхолларгдац мерза денош!

Вахара талгIенаша, массе миIинге кхоачийташ, дIа-хьа кхувс сага уйлаш. Ма дукха, дега тоам беш дола, хIамаш дагадох тIехьашкахьа юхахьажача. ХIанз хийла оалаш хоз-кх вайна — «Ма беркате ханаш яр-кх уж цу хана лаьттараш»! Кхы хургдеций хьоагIа иштта?! Юхахьежача хIара сага, цхьацца, дега морзал тосса ханаш дагайохийташ дешаш да уж! Уйла яьйий оаша, къаьстта тахан, геттара чIоагIа хIана даьржад вайна юкъе уж къамаьлаш аьнна??? Беркате ханаш яр дIаяхараш оал боккхийча наха. Я а яр уж ханаш беркатах хьалйизза!

БIаьстан хоза ха латт вайна. Дийна а волаш укх ханага кхачар а цхьа Даьла къахетам ма бий. Мел дукха хIама хул бIаьстан деношца дувзаденна. Ахкан вай кхоабаш, гуйран деношца чуэцаш дIаьхача Iан Iалошо ер, бIаьстено ший керахь чуэцаш деций. Хьалха-м бIаьсти хьаяьнналга массанахьа хоалуш хулар. Сомадала, адам яхаш, кхайкарал деш, адам къахьегама тIахьехаш гора бIаьстено.

Цхьатарра арабоалар нах, йIовхала зIанарг аракъадарца, шоай бешамаш цIенъе. ХIара бешара йоага, йоккхий цIераш гора гаьннара хьежача. Йолхьинг хьакхий, шедола мергIилг гулдий, коа тIе санна, цIенъйий Iооттайора наха, цIи мел йоаккхаргйола хаьсаш дIадувргдола бешамаш. Цхьанне коара яьлча эгIа вахачун коа йоалаш, цигара йаьлча цхьаькхане беша йоалаш, ерригача урама цIен тIехьенашка мел яда бешамаш оахаш хулар трактор. Цун тато арабаьхий берригаш шоайла дIай-хьай кхайкаш, цигара ваьлча тхацига вола яхаш, аргIа оттайий дIахьора Дала хьателача берката хам беш, хьаьнала къахьегамца яьккхача сискалца дезал кхебе Iемача наха.

Фу хургдар цул хозагIа, алал? Согара ябакха генаргаш геттара дика да хьона, са нарсий ги сиха тIадоаларех да, хьанаьхко кIай хьажкIаш лургья аьннад вайна, яхаш, цхьа барт тайнача, безамеча къамаьлашца бахар нах. Царна юкъерча бувзамо хьахьокхар вIаши барт хилар, шоаш дIадийна хьадаьккхачо, уж дувцалга доацаш, дог гIозадоаккхаш болга. Кхыметтале, хIара хIама малагIча дийнахьа дIае арабовргба тIехьа хоадам бий хулар цу хана. Шоаш кулгашца кхедаь морх бизза дола беркат, хIара шера чукхухьаш хьабоагIарашта дика ховра нарсаш малагIча кIира йийча дика хул, ябакха дезараш малагIа денош да, иштта дIахо а. Шоайла дагабувлаш, доацар дIай-хьай луш дIахьора цу ханарча кхалнаха из беркате ха. Цудухьа воккха вар а зIамига вар а духхьала денош дагардеш бIаьстенга сатувсаш, цунца сакъердлуш хулар. Ма безаме а хулар-кх массанахьа.

Сомадаьннача адамийи, ший беркатаца уж хьоабаьча, бIаьстана оаз латташ хулар-кх хIара урам тIа. Тахана-м дац иштта! Цхьа гаьнна тIехьашка йисача санна, хийраяьнний-кх дуккхабарашта уж ханаш. Наггахьа саг мара висавац, цу гIулакхашца дог ловзаш. Деррига, кхо мах телаш, базар тIара чукхухьаш дикагIа хет таханарча дукхагIа болча кхалнаха. Вайна массанена ховш да-кх нIана ца латийта, ханал хьалха кхачийта гIерташ, йоккхийча аренашка хаьсаш кхедераша царна укх дунен тIа мел йола молха етталга.

Лораша кхайкарал деш хоз-кх нахага, ах сахьата дирача хила йоадайий мара арара ийца чубена сомаши, хаьсаши ма даа яхаш. Хьай бешара чуена нарс Iа хоадаешшехьа, деррига цIа цун хозача нарсий хьажах хьалдуз, коа тIа Iайха кулг тохаш кхеяьча помидуро боккъонца дола берал дагадохийт.

Со зIамига йолча хана, тха нанес дIаювш хиннача помдора чам ма бий ер йоахар цхьане. Хийла цхьайолча кхалсага беш хьоайича оалаш хоз-кх, бера санна доал деш, ма дукха даараш кхедир цо ший беша. Бера санна доал деш, из тайпара къахьегам безарца кулг тохаш, кхедаьчун чам ший тапара хул! Малав из иштта дац аргдар?! Дерригнех кхоачам хулаш бахацарий нах цу хана Iан кийчо йаь латта ларма тIенг аьлий дизий а ма хулар кхы фу эш хьогI укх чу аьнна, хеталуш. Дуккхача урамашка гIолла Iодоладелча, тахан, вайна гу сагал лакхагIа йоархI этта латта бешамаш. Дала саг кхаба хьаденна уж беркате, хьаьна дуккха гаьнарча пхьешкара адамаш кхо метр хиллал мукъагIа далар са доалахьа яхаш, хьегаш дола бIарг ма кхоачча шера лаьтташ, шерагара шерага доалаш куц хувцацалуш баIаехи ниттехи диза, акха жIалеша, шоай кIаьзий йоаржаю доазонаш хинна дада.

Цхьа ха яр иштта йоархI яьнна латтийта хоза дац аьле, вIалла дIацаюй а чIегIех цIенъйий беш Iооттаеш. ХIанза-м дукхагIачар из а лорадац. Тахан дуккхача моттигашка иштта тайсса ядача бешамаша дукхача хIамай уйла яйт. Хеталу, укх лаьттах хьогаш бахарий къа ма гIолда вайх аьле. Арахьа, йоккхача пхьешка бахача наха, шоай ах вахар дIахьу пхьен арахьа цхьа йоккха лаьттан чIегилг эца ахча Iоадеш. Балхара кIира цкъа доагIача салоIа дийнахьа, массехк сахьата никъ беш цига дIаухаш цхьацца кхача кхебу. Дукха хаи низи Iобул цар шоай кулгашца кхедаьр даа гIерташ. Цу мугIарера, нах хетаргахьа, тахан вай цIен тIехьенашка дадача лаьтташкара, хьал дайча мухь теха белха мегар. Шийна Дала деннача дика хам бе ца харо, дуккхача дикай наIараш дIакъовл! Хьалхарча наьха могашал геттара хала лийна боллашехьа, дуккха дикагIа хинний оал вай. Цар дегIаца хинна могашал тахан къонабарашка яц аьнна а оал. ЦIена бакъдолаш да из иштта хилар! Уйла яьйий вай из сенца дувзаденна хиннад?! Юаш мел яр хьалхарча наха шоай коашкара хьайоаккхаш ханний. Хаьсаш а, сомаш а, шурийцара даараш а, Iайха кхедаь дуаш хилча дика хул-кх могашал а.

ДегI дизза низ болаш баьхаб нах! Шоай даьна, нанна улув къахьегаш баьхкаб дезал. ВIалла хало а ца хеташ сакъердлуш даьд шоаша дер. Иштта кхебу, цар кхоаненах дог лазача даьша, шоай дезал, мерза вахар къахьегарца мара хила йиш йоацалга хьалхадоахаш. Да, нана болх беш боахкача хана, телефон бе елла бийша бадача дезалах, шоаша дуачун хам бовза тIехье хургья ала хала да. Даьла къахетам ба вайца! Цу хIаман лерхIами хами боабе мегаргбац вай! Хозача вахаро мара кхоллац мерза денош! АллахIа гIо долда вайна!