Skip to main content

Ма боабе нахацара лерхIам!

Къаьстта укх дешах лаьца дагадоахкараш дукха да...

Дукха да, вай мехка новкъа лелача газелешца, дIа-хьа ухаш мел волчун. ХIаьта, цу мугIарера нах кIезига бац! Боацалга гу, хIара денна лелача газелешка, цхьайолча хана, Iоха моттиг йоацаш уралатташ дIа-хьа ухараш зийча. ХIара Iуран деша е балха ухаш бараша, дика кхетадергда со ала гIертар. ХIана аьлча, царех хIаране дег чу къувлаш гIулакх да из, даьла денна хьехацадоай а. ДукхагIча даькъе иштта Iемад вай массанена новкъарле еш дола хIама хьоа ца деш, шийна чукъувлаш, хIаравар мел лелача хана, ше леладер нийса доацалга ховшшехьа из леладер кхы а паргIатагIа, майрагIа хул. Из нийса дац! Вай наькъашка лелача газелий хьал да, вай тахан теркалде дезар.

БIаьсти хьаяьнна йIайха ха хьаэттай, цунга хьежжа, газелешка дом хула ха я хьакхаьчар. Цхьайолча газеле чу дIачухьажий юстара боал нах, цу чу уллача демо, бIехача гIандаша юхабаьхий. Iаьдала автобусаш-м дом хулача ханашка йилий, чура гIандаш цIендий хул. Ала йиш яц, цу тайпара хIама укх мехка мел йолча юрташка, нах дIа-хьа кхувлача водителех. Вайна хов, 7-8 гIанда лаьрхIа, Iаьдало хьаяьча газелешка хийла 12-13 моттиг хулалга. ВIашка тоIIадий IодогI гIандаш газелий дас, нах дукхагIа халийта. Иза а, хала дале а сатохалургдолаш хIама дар, ше дIа-хьа кхувлараш балха, деша баха кийчбенна арабаьнна нах хилча, Iуйран, цIенъяьча газелеца машена да аравоаларе.

Сарралца нах дIа-хьа кхийла машен чура юла ца юлаш, юха шоллагIча дийнахьа нах гулбе ара мишта воал???!

Цхьаккха а тайпара, нахаца лерхIам ца хилар да из! Тамаш еций, укх тайпара бIехача машенаца шийна сискал яккха аравалар, — аьнна уйла яйташ да тахана вай наькъашкара хьал.

Сийрда барзкъа тIадувха саг цар чу, тешшаме, ха йиш йоацалга-м, дувцалга а дац! Цу гIулакха бехктокхаме болча кхуврча болхлоша, цхьаккха хоаттам бац — хьогIа цу нахага?! Боре, иштта хургдацар аьнна хет! ДIаарахьа ваьлча, кераста наха юкъе, йоккхача пхьешка лела чура цIенъяь, кораш, гIандаш дом боацаш йола газелеш бIаргаяйча, чIоагIа дега новкъарле еш хул вайцигара хьал.

Вай бусалба нах ма дий! Вай, динага диллача а бокъо мичай, иштта нахацара лерхIам боабе. Саг-м шийна мелла хале дале а дIатIахов, хетаргахьа, бетта а цIенъяь йоацача газеле чу, кхы де хIама доацаш. Вай тахан бувцар, из лоаллаш вагIачун нахацара лерхIам ба! Кулг тесса ца а дуташ, вай массане оарцагIдаьнна нийсде дезаш гIулакх да аьнна хет сона из. Сарралца цу машенаца сискал йоаккхаш лийна, чуваха са, г шоллагIча дийнахьа, Iуйран, чура йила, цIенъяьча машенаца вала веза нах тIаховшабе ара! Цхьа хIама кхетадаь из диццадеш хила деза вай! Вай вIаши лелабеча лерхIамага хьежжа хургба АллахIа вайцара лерхIам а! 

Абойнаькъан Ина